“Zəlzələdən sonra həqiqətən də çox çətin anlar yaşadıq. Nə dediyimi bunu yaşayanlar daha yaxşı anlaya bilər. Həyatlarını itirənlərə başsağlığı verirəm. Çətin durumda olanlara isə şəfa və tezliklə əvvəlki həyatlarına qayıtmağı arzulayıram. Çətin durumda olanlara bəzi şeylər verə bilərik. Amma təəssüf ki, itirilən həyatları geri verə bilmirik. Zəlzələdə zərər görmüş insanların yanında olduğumuzu göstərməli, hiss etdirməliyik. Vicdan sahibi olan hər kəs bu məsələdə əlindən gələni etməlidi. Mən də etməyə çalışıram. Bertuğ Yıldırımı çox bəyənirdim. Mənim üçün də, “Hatayspor” üçün də önəmli oyunçu idi. Amma aramızdan ayrıldı. “Renn” kimi Fransanın önəmli və hədəfləri olan bir klubuna yollandı. Artıq onun boşluğunu doldurmuşuq. O mövqeyə yeni oyunçu tapmışıq. Az öncə həmin oyunçu ilə görüşüb söhbət etdim. Oyun tərzinə görə Bertuğa bənzəyən futbolçudu. Həm irəlidə, həm oyun qurucusu kimi, həm də cinahlarda oynamağı bacaran bir futbolçu da almağı planlaşdırırıq. Altay Bayındır “Fənərbaxça” üçün bir dəyər idi. Necə ki, Uğurcan Çakır da “Trabzonspor” üçün dəyərdi. İrfan Can Eğribayatın performansını da bəyənirəm. Altayın “Mançester Yunayted”ə yollanması məni sevindirdi. Amma digər tərəfdən “Fənərbaxça”dan ayrıldığı üçün üzgünəm. İngiltərə futbolu ona səviyyəsini bir qədər də yüksəltməyə yardım edəcək. Fernando Musleraya gəlincə, onun məndən daha yaxşı qapıçı olduğunu etiraf etməliyəm. “Qalatasaray” üçün böyük bir dəyərdi. Türkiyədə çox sevilir. Ayrılması hər kəsi üzəcək. Mən qalmasının tərəfdarıyam. Fikrimcə, qalmalı və vida matçını “Qalatasaray”da keçirməlidi. “Qalatasaray” ötən mövsüm Okan Burukun düzgün planları sayəsində çempion oldu. Buruk adlı-sanlı oyunçuları çox yaxşı idarə etdi. Liderlik keyfiyyətlərini göstərdi. Futbolçuları özünə inandırmağı bacarıb. Məncə, Okan Burukun ən önəmli özəlliyi məhz budu. Təbii ki, 18 illik futbolçu karyeramın olması məşqçilikdə mənə fayda verir. Çünki bir çox önəmli məşqçilərin rəhbərliyi altında oynamışam. Qeydlər aparmağı, yazmağı xoşlayıram. Futbolçu olduğum dönəmdən qalan qeydlərim var. Hələ ki məşqçi karyeramın pis irəliləmədiyini düşünürəm. Ən böyük hədəfim xaricdə çalışmaqdı. Allahın izni ilə bir gün bu arzuma çatacağıma inanıram. Amma bu, gələcəyin işidi. İndiki anı yaşamağı da bacarmaq lazımdı. Sabah nə olacağını heç kim bilmir. Heç kimi incitmədən, heç kimin qəlbinə dəymədən həyatımı davam etdirirəm”.