Estoniya üzərində qələbə qazana bilməyən yığmamız üç aydan sonra Belçikanı qəbul etdi.

Təbii ki, ölkənin əsas komandasının dünya reytinqində ilk sıralarda qərarlaşan güclü rəqibə qalib gələcəyini gözləməyənlərin sayı çox idi. Amma səmimi etiraf etməliyik ki, Canni de Byazinin rəhbərlik etdiyi yığma cari seçmə mərhələdə bəlkə də ən yaxşı matçını keçirdi. Kuryoz qolla üzülməyimizə rəğmən, belçikalılarla döyüşdük. Bəs futbolçulardan kim necə oynadı?

Şahruddin Məhəmmədəliyevin yenə də qapını qoruyacağı heç kimdə şübhə doğurmurdu. Dağıstanlı özünü yaxşı tərəfdən göstərdi. Məhz onun seyvləri Lukaku qarışıq qonaqların sevinməsinə imkan vermədi. Bircə o kuryoz qol olmasaydı… "Adana Dəmirspor"a keçən qolkiper yeni komandasında debüt ərəfəsində yığmada yaxşı performans göstərdi.

Çoxlarını təəccübləndirən məqam italiyalı mütəxəssisin start heyətində Rahil Məmmədova şans verməsi idi. "Qarabağ"ın müdafiəçisi həyəcanlı göründü. Hücumlara qoşulmağı qənaətbəxş idisə, müdafiədə etibarlı deyildi. Xüsusən də ilk yarıda. Həmin sözləri Krivotsyuk haqda da demək olar. Ukraynalı Lukakuyla mübarizədə bacarmırdı. Yaxşı ki Bəhlul bir neçə dəfə onu “sığortalaya” bildi. Hər iki müdafiəçi zəif çıxışla yadda qaldı. Görünür, De Byazi rəqibin heyətində ucaboy və standart vəziyyətlərdə yaxşı oynayanların çoxluğunu nəzərə alaraq Rahillə Anton üzərində dayanmışdı.

Evlin Cəfərquliyev işinin öhdəsindən gəldi. Təbii ki, "köhlən atlar"ın müdafiəçisi start sürətiylə hücumlara çıxmaqda və Şeydayevlə bir-birini tamamlamaqda daha effektliydi. Toral da bacarıqlarını göstəməyə çalışdı. Amma Elvin qədər göz oxşamadı.

Bəhlul müdafiənin divarı oldu desək, yanılmarıq. O, yalnız müdafiənin mərkəzində yox, cinahlarda və dayaq yarımmüdafiəçisi mövqeyində də çoxlu “qara iş” gördü. Rəqibin təhlükəli hücumlarının boğulmasında Bəhlulun xüsusi əməyi oldu. Aleksey nə qədər çalışsa da, oyunu istədiyi kimi alınmadı. Bəlkə də Coşqunla tandemdə uzlaşa bilmədilər. Belçikalıların qolundakı səhv seriyası İsayevlə başladı, Coşqunla tamamlandı. Coşqunun ən xoş cəhəti 65-ci dəqiqədə rəqib qapısını yoxlamaq oldu ki, onda da qolkiper seyvlə cavab verdi. Emin də gücü və bacarığı daxilində döyüşdü. Onun real qol imkanı zamanı həmləsinə müdafiəçi ayaq qoydu. Əslində kapitanın fərqlənməsi üçün oyunda standart vəziyyətlər çox az oldu. Xeyrimizə cərimə zərbələri verilsəydi, bəlkə də "8 nömrə" fərqlənə bilərdi.

Renatla Ramil irəlidə yaxşı anlaşaraq rəqibi daim təzyiq altında saxladı. Əsasən də Şeydayev belçikalılar üçün yaxşıca başağrısı oldu.
Yığmamızda uzun ötürmələrdə inkişaf hiss olunsa da, yenə də üstünlük qısa ötürmələrə verildi. De Byazinin sonradan meydana buraxdığı oyunçular çox da fərqlənmədi. Düşünürəm ki, Coşqun, Aleksey və Toralın əvəzinə ilk dəqiqələrdən meydanda Ozobiç, Qismət, Yusif şans qazansaydı, daha məqsədəuyğun olardı. Həmçinin 5-li müdafiə əvəzinə 4-lü müdafiə variantında hücuma daha çox futbolçuyla çıxmaq olardı.

Ümumilikdə yığmamız pis çıxış etmədi. Coşqunun səhvindən dolayı buraxılan kuryoz qol olmasaydı, Renat, Ramil və Eminin həmlələri uğurlu bitsəydi, məğlubiyyətdən qaçmaq olardı.

ABDULLA İSMAYILOĞLU