"Bu gün gənc Yusifə şans vermək daha məntiqli olar"
Martın 24-də yığmamız seçmə mərhələ çərçivəsində ilk rəsmi oyununu keçirəcək.
"Football-plus.az" xəbər verir ki, rəqib güclü Avstriyadı. Bu qarşılaşmadan 3 gün sonra isə FİFA reytinqində 4-cü olan Belçika ilə oynayacağıq.
Hazırda yığmada ən problemli mövqe qapı xəttidi. Canni de Byazinin sərəncamında 3 "əlcək sahibi" - Səlahət Ağayev, Emil Balayev və Yusif İmanov var. Onlardan hansının daha şanslı olduğunu öyrənmək üçün təcrübəli mütəxəssis Xəyal Zeynalovun fikirlərini öyrəndik. "Yığmamızın son 5 uğurlu oyununu nəzərə alsaq, futbolçularımızda özünəinam, əhval-ruhiyyə yaxşı səviyyədədi. Yeganə çətinlik səfərdə ardıcıl 2 güclü rəqiblə oyunumuzun olmasıdı. Qapıda kimin dayanmalı olduğuna gəlincə, hər üçü pis qolkiper deyil. Amma hazırkı performans sarıdan yanaşsaq, Yusif İmanov daha üstündü. "Sabah"ın yetirməsi ölkə çempionatında 27 turun hamısında meydanda olub. Düzdü, Səlahət və Emillə müqayisədə onun milli komandada təcrübəsi yoxdu. Amma təcrübə heç də hər şey demək deyil. Düşünürəm ki, bu gün gənc Yusifə şans vermək daha məntiqli olar. Həm qapıçını yığmamıza qazandırarıq, həm də onun inkişafına təkan vermiş olarıq. Ümumiyyətlə, tək Yusif İmanova yox, perspektivli gənc futbolçuların hər birinə şans tanınmasının tərəfdarıyam. Baxın, Şahruddin Məhəmmədəliyevin əli sınanda, demək olar, hamı "matəm" etdi ki, bəs "Qarabağ" ilə millinin oyunları gəlir, qapıda kim duracaq? Məhz bu narahatlığın olmaması üçün mütləq gənclərə yol açılmalı, güvənilməlidi. Baxın, "Sabah" yetərincə imkanlı klubdu. Amma bizim heyətimizə nəzər yetirsəz, görərsiz ki, bütün qapıçılarımız gənc yerlilərdi. Baş məşqçi Murad Musayevin ən üstün tərəflərindən biri odu ki, gənclərə şans verir. Rusiyalı mütəxəssis vaxtilə "Krasnodar"da çalışarkən də perspektivli gənclərə güvənirdi. Onun bir vaxtlar şans verib irəli çəkdiyi gənc qolkiper Matvey Safonov hazırda Rusiya millisinin 3 qapıçısından biridi. Sözüm odu ki, Yusif İmanov hazırkı səviyəsinə gəlmək üçün üzərində çox çalışıb. "Sabah"ın bütün yaş qruplarında çıxış edib, indi də əsas komandanın "1 nömrə"sidi. Şəxsən mənə ən çox toxunan belə perspektivli gənc qapıçının aşağı yaş qrupları üzrə yığmalarımıza dəvət almamasıdı. Yalnız U-21-ə dəvət edilib və cəmi 1 matçda ona şans verilib. Əksi olsaydı, futbolumuz qazanacaqdı. Bəlkə də Avstriya və Belçika ilə oyunlarda Yusif özünü o qədər yaxşı tərəfdən göstərəcək ki, ona xarici klublardan təklif gələcək. Ona görə də gəlin gəclərimizə inanaq, onlara şans verək. Qarşıdakı 2 oyunda millimizə uğurlar arzulayıram. İnanıram ki, Yusif İmanova şans verilsə, özünü yaxşı tərəfdən göstərəcək".
ABDULLA İSMAYILOĞLU
Digər xəbərlər
