Üç gündən sonra yığmamız seçmə mərhələ çərçivəsində ilk rəsmi oyununu keçirəcək. Rəqib güclü Avstriyadı. Bu qarşılaşmadan 3 gün sonra isə FİFA reytinqində 4-cü olan Belçika ilə oynayacağıq.

Hazırda yığmada ən problemli mövqe qapı xəttidi. Şahruddin Məhəmmədəliyevin zədələnərək sıradan çıxması, Mehdi Cənnətovun formada olmaması "çərçivə" ilə bağlı narahatlığı artırıb. Canni de Byazinin sərəncamında 3 "əlcək sahibi" - Səlahət Ağayev, Emil Balayev, Yusif İmanov var. "Sabah"ın qapıçısından başqa digər qolkiperlərin yığma təcrübəsi var.

İtaliyalı mütəxəssisin kimə şans verəcəyini demək çox çətindi. Qolkiperlərin mövsüm ərzindəki çıxışlarına nəzər yetirsək, "bayquşlar"ın "12 nömrə"si özündən yaşda böyük həmkarlarını qabaqlayır. 20 yaşlı qapıçı geridə qalan 27 turun hamısında start heyətində meydana çıxmaqla 2430 dəqiqə oynaylb, qapısında 18 qol görüb. Səlahət Ağayev 26 oyunda 2340 dəqiqə çıxış etməklə 31 dəfə topu tordan çıxarıb. Emil Balayevin göstəricisi isə daha zəifdi. "Dənizçilər"in qapıçısı 24 oyunda 2072 dəqiqə meydanda olmaqla 34 dəfə rəqib futbolçular tərəfindən məyus edilib.

Yığmadakı praktikaya gəlincə, "Qəbələ"nin qapıçısı həmkarlarından üstündü. "Qırmızı-qaralar"ın "1 nömrə"si ölkənin əsas komandasında 21 oyun keçirməklə 26 qol buraxıb. Emil Balayev isə 13 matçda 19 dəfə məyus olub.

Təbii ki, dünənki göstəricilər bu gün ölçü vahidi sayıla bilməz. Yəni, De Byazinin sərəncamında 2 təcrübəli qapıçının olması gənc Yusif İmanovun ofsaydda qalacağı anlamına gəlməməlidi. Amma rəqiblərin olduqca güclü olmalarını nəzərə alsaq, sözsüz ki, qapıda ən hazırlıqlı, etibarlı "əlcək sahib"inə şans veriləcək.

Düşünürəm ki, əsas rəqabət Səlahətlə Yusif arasında gedəcək. Ola bilər, italiyalı mütəxəssis "Sabah"ın gənc qapıçısına şans verməklə riskə getsin. Ən azı Yusif həm yığma həyəcanı yaşamaqla ilk təcrübəsini qazanacaq, həm də istisna deyil ki, yaxşı çıxışla etimadı doğruldacaq. İstər ölkə, istərsə də dünya futbolunda gənc qolkiperlərin şans qazanandan sonra komandasının "1 nömrə"sinə çevriləməyi bacardığı haqda yetərincə nümunə var.

De Byazinin 5-li, yoxsa 4-lü müdafiə xəttinə güvənəcəyindən də çox şey asılıdı. Arxa xətdə 5 müdafiəçi oynayacaqsa və əsas məqsəd rəqiblərin hər birindən 1 xal qoparnaq olacaqsa, "çərçivə"də Yusifin dayanmaq ehtimalı çoxdu. "Sabah"ın qapıçısı yeri gələndə sonuncu müdafiəçi kimi də oynaya bilir.

Yox, 4-lü müdafiəyə güvənilib, orta sahədə çoxalıb top saxlamaq və rəqibi əks-hücumlarda yaxalamaq planlaşdırılırsa, qapıda daha təcrübli "əlcək sahibi"nə şans veriləcək və böyük ehtimalla bu Səlahət Ağayev olacaq. De Byazinin kimə güvənəcəyini 3 gün sonra biləcəyik...

ABDULLA İSMAYILOĞLU