“Beşiktaş”ın ev oyunlarını keçirdiyi “Beşiktaş Park” stadionu ilə bağlı xəbər var.

"Football-plus.az" xəbər verir ki, Türkiyə Futbol Federasiyasının idarə heyətinin sentyabrın 5-də keçirilən iclasında stadionla bağlı yeni qərar qəbul olunub. Federasiyadan verilən rəsmi məlumatda qeyd olunub ki, “Beşiktaş Park”ın iki avrokubok finalından birinə evsahibliyi etmək üçün namizədliyi UEFA-ya göndərilib. Söhbət 2025/26 və 2026/27 mövsümlərində Avropa və Konfrans Liqalarının finalından gedir. Bununla bağlı yekun qərar UEFA-nın İcraiyyə Komitəsinin gələn ilin mayında keçirəcəyi toplantıda veriləcək.

Xatırladaq ki, 2017-ci ilin aprelində istifadəyə verilən, 42590 yerlik stadion bu ilin yayına qədər “Vodafon Park” adlanırdı. Amma “Vodafon” şirkəti ilə sponsorluq anlaşmasının müddəti bu yay bitdi. Yeni sponsor isə hələ tapılmayıb. “Beşiktaş Park” bir neçə il öncə artıq bir önəmli matça evsahibliyi edib. 2019-cu ildə “Liverpul”la “Çelsi” arasında Avropa superkuboku uğrunda oyun məhz bu arenada keçirilmişdi. Əsas və əlavə vaxtı 2:2 bitən həmin oyunda “Liverpul” oyunsonrası penalti seriyasında 5:4 üstün olmuşdu.