Meydan sahibləri məğlubiyyət seriyasını bitirmək, qonaqlar isə qələbə seriyasını davam etdirmək istəyirdi.

"Football-plus.az" xəbər verir ki, ardıcıl uğursuzluqlar “Qəbələ”nin üzərində ağır təzyiq yaratmışdı. Rəhbərliyə və baş məşqçiyə ünvanlanan tənqidlərə cavab labüd idi. Düzdü, qələbə komandanı autsayder mövqeyindən qurtarmayacaqdı. Amma yığma fasiləsinə yaxşı əhval-ruhiyyə ilə yollanmaq imkanı yaradacaqdı.

Elə ilk dəqiqələr hər iki komandanın baxımlı oyun nümayiş etdirəcəyindən xəbər verirdi. "Qırmızı-qaralar" özünü heç də autsayder kimi aparmırdı, onlar cəsarətlə irəli atılır, hücum futbolu oynamağa çalışırdı. Meydan sahibləri sanki ölüm-qalım savaşına çıxmışdı. Komanda təhlükəli hücumlarla qol vəziyyətləri yaratmaq istəyirdi ki, nəticədə künc zərbəsi qazandılar. "Zirə" müdafiəçiləri Eminin qapı önünə göndərdiyi topu uzaqlaşdırsalar da, "Qəbələ" geri çəkilmədi. Rauf Haninin ötürməsindən faydalanmağı bacardı. Qapıçı Renatoya dəyərək yönünü dəyişən topu saxlaya bilmədi. Beləliklə, 20-ci dəqiqədə hesab açıldı - 1:0. İlk hissəsin davamı qarşılıqlı təhlükəli hücum cəhdləriylə yadda qaldı. "Qırmızı-qaralar"ın Allaşı üç, "qartallar"ın Suması bir təhlükəli hücum cəhdini qolla bitirməyi bacarmadı. Sözsüz, Əzizli "Zirə"nin hesabı bərabərləşdirməsinə bir neçə dəfə mane oldu. Qolkiperin debütü uğurlu alınırdı. "Qəbələ" isə qol imkanlarını fərdi səhvlər üzündən boşa verirdi. Xüsusilə Əyyubun topla tələsik rəftarı diqqəti çəkirdi. Beləliklə, müydan sahibləri fasiləyə öndə yollandı.

İkinci hissənin daha gərgin keçəcəyi bəlli idi. Məlum oldu ki, Qəbələ şəhər stadionunda sonuncu qələbəsini 2016-cı ildə qazanan (1:2) "Zirə" bunu nəzərə alıb. Rəşad Sadıqov fasilədən sonra heyətdə dəyişikliklər etdi. Çalışdırıcı "qırmızı-qaralar"ın əks-hücumlara ümid bəsləyəcəyini təxmin etmişdi. Bu üzdən Məqsədi müdafiənin soluna çəkdisə, Qismətə sağı əmanət etdi. Nəticədə hücumların kəsəri artdı. Qol vəziyyətlərini tamamlamaq isə Rüstəm Əhmədzadə, İssa Cibrila və Filipe Paxtmana tapşırılmışdı. Buna baxmayaraq, hücum xəttində əlindən gələni edən futbolçular Rəşad Əzizli səddini keçə bilmirdi. Qolkiper xüsusilə Rüstəmin güclü zərbəsini dəf etdi. Sonuncu dəqiqələrdə Auaşeriya iki dəfə "çərçivə"ni nişan alsa da, Silva ayıq-sayıq idi. Uzatma dəqiqələrində yaddaqalan təhlükə qeydə alınmadı. Ümumiyyətlə, meydanda sanki turnir cədvəlinə görə liderlə autsayderin yox, iki bərabərsəviyyəli komandanın savaşını izlədik.

Gözdən qaçmadı
* "Zirə"nin "Qartallar" fanklubu "Qəbələ"nin "Red-Black Army" azarkeş qrupunu sayca azı iki dəfə üstələyirdi.
* Rauf vurduğu qolu qeyd etmədi. Rəşad isə bu münasibətlə meydançanın ortasına qədər qaçdı. Onların ikisi də daha əvvəl "Zirə"də çıxış edib.
* 45-ci dəqiqədə Eldar İlkini sinəsindən itələyərək yeri yıxdığına görə insident yaşandı. Baş hakim 4 "sarı"yla aranı qismən sakitləşdirdi. Lakin İlkin narazılığa və hakimlə müzakirələrə davam edirdi. Elmar Baxşıyev çarəni onu əvəzləməkdə gördü.
* 73-cü dəqiqədə Baxşıyev hakimə sərt şəkildə irad bildirdiyi üçün qırmızı vərəqəylə texniki zonadan uzaqlaşdırıldı. Baş məşqçi Haninin yerdə qaldığı anlarda oyunun saxlanılmamasına görə özündən çıxmışdı.

KƏNAN BAHADIR