UEFA-nın “Beşiktaş”a verdiyi cəza məlum olub.

"Football-plus.az" xəbər verir ki, xatırladaq ki, Konfrans Liqasının 2-ci təsnifat mərhələsinin “Tirana” ilə səfərdəki cavab oyunundan öncə “Beşiktaş” fanatları tribunada petard yandırmış və meydana yad cisimlər atmışdılar. Nəticədə oyun 15 dəqiqə gec start götürmüş və UEFA olayın araşdırılacağını açıqlamışdı. Bu hadisə İstanbul nəhənginə 40 min avroya başa gəlib. Komanda cəza kimi məhz bu məbləği ödəyəcək. Bundan başqa, “Beşiktaş” avrokuboklarda 1 səfər oyununda azarkeş dəstəyindən məhrum edilib. Amma bu cəza şərti xarakter daşıyır. Belə ki, “ağ-qaralar”a 2 il sınaq müddəti qoyulub. Bu müddət ərzində eyni hadisə təkrarlanacağı halda cəza qüvvəyə minəcək. “Tirana” ilə səfər oyununda birbaşa qırmızı vərəqə alan sol müdafiəçi Artur Masuakunun cəzası isə 2 oyundan 1 oyuna endirilib. Yəni təcrübəli müdafiəçi Bakıdakı oyunu buraxsa da, cavab görüşündə meydanda olacaq. Onu da bildirək ki, “Beşiktaş”ın Bakıya gətirdiyi oyunçular arasında Masuakudan başqa zədəsini tam sağaltmayan Cenk Tosunla Rəşid Gezzal da yoxdu. Amma əvəzində yeni transfer Ante Rebiç Bakıda Şenol Günəşin ixtiyarında olacaq.

Günəşdən söz düşmüşkən, “Beşiktaş”la bağlı bir xəbəri də diqqətinizə çatdıraq. Təcrübəli mütəxəssis bugünlərdə keçirdiyi mətbuat konfransında Anderson Talişka ilə bağlı diqqətçəkən açıqlamalar vermişdi. Onun sözləri “Beşiktaş”a problem yarada bilər. Əvvəlcə Günəşin açıqlamasını xatırlayaq: “Talişka ilə telefonda söhbətim oldu. “Beşiktaş” üçün darıxdığını və qayıtmaq istədiyini söylədi. Amma illik qazancı 10 milyon avrodan aşağı deyil. Ortaq məxrəcə gəlməyimizi istədi”.

Qeyd edək ki, hazırda “Əl-Nəssr”də top qovan və Kriştiano Ronaldonun komanda yolaşı olan braziliyalı 2016-18-ci illərdə “Beşiktaş”da çıxış edib və oyunu ilə iz buraxmağı bacarıb. Günəşin sözləri “Əl-Nəssr”də narahatlığa səbəb olub. Bu üzdən Talişka sosial şəbəkədəki səhifəsində bununla bağlı paylaşım etməli olub: “Son dönəmlərdə ortaya atılan yalan xəbərlər var. Mən heç kimlə transfer mövzusu barəsində danışmamışam və görüşməmişəm. “Əl-Nəssr”dən ayrılmaq niyyətim yoxdu. Burda xoşbəxtəm və üstəlik yaxınlarda müqaviləmi 3 illik yeniləmişəm. Qarşıdakı mövsümün startını səbirsizliklə gözləyirəm”.

Bu arada məlum olub ki, “Əl-Nəssr” rəhbərliyi Talişkanın durumunu diqqətlə izləyir. Hətta Türkiyə mətbuatının yazdığına inansaq, ərəblər onların oyunçusu ilə gizli danışıq aparmağa çalışan “Beşiktaş”dan FİFA-ya şikayət edə bilər. Belə olacağı təqdirdə İstanbul nəhəngi FİFA qarşısında özünü müdafiə etməli olacaq.