Avqustun 19-da Çempionlar Liqasının (ÇL) 3-cü təsnifat mərhələsinə yekun vuruldu.

“Football-plus.az” xəbər verir ki, həmin gün cavab görüşləri çərçivəsində nəzərdə tutulan son oyun - AEK – “Dinamo” matçı keçirildi.

Bu mərhələnin təxirə salınan ilk görüşü şənbə günü baş tutmuşdu. Səbəb Afinada avqustun 8-də keçirilməli olan AEK – “Dinamo” matçından əvvəl rəqib azarkeşlər arasında böyük qarşıdurma yaşanması ilə bağlı idi. Bir daha xatırladaq ki, Yunanıstanın paytaxtında baş verən insidentlər nəticəsində 29 yaşlı yerli fanat bir neçə bıçaq yarası alaraq ölmüş, 8 azarkeş müxtəlif dərəcəli xəsarətlər almış və 109 nəfər saxlanılmışdı. UEFA AEK – “Dinamo” oyununu avqustun 19-na təxirə salmışdı. Bu komandalar arasında Xorvatiyadakı matç isə əvvəlcədən təyin olunan tarixdə - ayın 15-də tamaşaçısız keçirilmişdi. Mahir Emrelinin formasını geydiyi “Dinamo” öz meydanında 1:2 hesabı ilə uduzmuşdu.

Yığmamızın hücumçusu Afinada tamaşaçısız keçirilən cavab görüşündə meydana çıxmaq şansı qazanmadı. Onun komandası Zaqrebdəki oyunla müqayisədə daha yaxşı təsir bağışladı. İqor Bişçanın çalışdırdığı Xorvatiya çempionu əsas vaxtı 2:0 hesabıyla öndə başa vurdu. Bu nəticə “Dinamo”nu pley-offa daşıyacaqdı. Lakin xorvatlar əsas vaxta əlavə olunan dəqiqələrdə iki dəfə şok yaşadılar. 90+2-ci dəqiqədə AEK-in argentinalı hücumçusu Arauxo fərqi minimuma endirdi. Bu hesab 30 dəqiqəlik əlavə vaxtı zəruri edəcəkdi. Qarsiya 90+10-cu dəqiqədə penaltini qola çevirə bilsəydi, afinalılar növbəti mərhələyə çıxacaqdılar. Amma yunanların hücumçusu əla şansı boşa verdi. Bununla belə, Vida bərabərlik qolunu vurdu. Bəli, 34 yaşlı xorvat müdafiəçi 2011-13-cü illərdə formasını geydiyi “Dinamo”nun ÇL-də mübarizəni dayandırmasına səbəbkar oldu! AEK pley-offda “Antverp” ilə qarşılaşacaq. Belçikanın son çempionu ilə ilk oyun bu gün səfərdə keçiriləcək.

Yeri gəlmişkən, zaqreblilərin ÇL-də mübarizəni dayandırması Bişçanın aqibətini müəyyən edib. Rəhbərlik onu baş məşqçi vəzifəsindən istefaya göndərib. 45 yaşlı mütəxəssis “Dinamo”ya apreldə təyinat almışdı. Bişçanın yerinə Sergey Yakiroviç təyin olunub. O, ötən mövsüm yerli “Riyeka”nı çalışdırıb. Yakiroviçin yeni komandadakı rəsmi debütü Avropa Liqasının pley-off məhələsinin avqustun 25-də keçiriləcək “Sparta” ilə ilk oyununa təsadüf edəcək.

3-cü təsnifat mərhələsi, cavab oyunu
AEK (Yunanıstan) - Dinamo (Xorvatiya) 2:2 (ilk oyun - 2:1)
Arauxo, 90+2. Vida, 90+11 – Şutalo, 45+1. Lyubiçiç, 65.