Avqustun 15-də Çempionlar Liqasının (ÇL) 3-cü təsnifat mərhələsinə böyük ölçüdə yekun vuruldu. Həmin gün cavab görüşləri çərçivəsində nəzərdə tutulan 9 oyun keçirildi. Çərşənbə axşamı bu mərhələnin təxirə salınan ilk görüşü də baş tutdu.

"Football-plus.az" xəbər verir ki, səbəb Afinada avqustun 8-də keçirilməli olan AEK – “Dinamo” matçından əvvəl rəqib azarkeşlər arasında böyük qarşıdurma yaşanması ilə bağlıdı. Yunanıstanın paytaxtında baş verən insidentlər nəticəsində 29 yaşlı bir yerli fanat bir neçə bıçaq yarası alaraq ölmüş, 8 azarkeş müxtəlif dərəcəli xəsarətlər almış və 105 nəfər saxlanılmışdı. UEFA AEK – “Dinamo” oyununu avqustun 19-na təxirə salmışdı. Bu komandalar arasında Xorvatiyadakı matç isə əvvəlcədən təyin olunan tarixdə - ayın 15-də tamaşaçısız keçirildi. Mahir Emrelinin formasını geydiyi “Dinamo” fasilə ərəfəsində hesabı açsa da, afinalılar ikinci hissədə iki cavabsız qol vuraraq əzmkar qələbə qazandılar. Yığmamızın hücumçusunun meydana fasilədən dərhal sonra çıxdığını da qeyd edək.

Srağagün keçirilən matçlar sırasında Kolossi şəhərindəki görüş də bizim üçün az-çox maraqlı idi. “Qarabağ”a 2-ci təsnifat mərhləsində üstün gələn (3:2, 1:1) “Rakuv” bu mərhələdə BATE-ni (Belarus) iki oyunun ümumi nəticəsinə əsasən 11:5 hesabı ilə mübarizədən kənarlaşdıran “Aris”i Cənubi Kiprdə də məğlub etdi - 1:0. Bu mövsümün ən sürpriz komandası sayılan “Klaksvik” isə uğurlu seriyanı davam etdirə bilmədi. Evdə “Molde”yə 2:1 hesabıyla qalib gələn Farer adalarının çempionu Norveçdə iki cavabsız top buraxmaqla uduzdu.

Bu mərhələdə “Marsel”in mübarizəni dayandırması bir qədər gözlənilməz oldu. Fransa nəhəngini penalti seriyası ilə mübarizədən kənarlaşdıran “Panatinaikos”dan başqa PSV, “Braqa”, “Qalatasaray”, “Kopenhagen”, “Makkabi” (Hayfa) və “Reyncers” də pley-offa adladı.

3-cü təsnifat mərhələsi, ilk oyun
Dinamo (Xorvatiya) - AEK (Yunanıstan) 1:2
Bulat, 39 – Tsuber, 59. Qalanopulos, 90.
Cavab oyunu avqustun 19-da keçiriləcək.
Cavab oyunları
Aris (Cənubi Kipr) - Rakuv (Polşa) 0:1 (ilk oyun - 1:2)
Tudor, 49.
Marsel (Fransa) - Panatinaikos (Yunanıstan) 2:1, p. - 3:5 (0:1)
Obameyanq, 2; 45+1 – İoannidis, 90+9-p.
Sparta (Çexiya) - Kopenhagen (Danimarka) 3:3, p. – 2:4 (0:0)
Birmançeviç, 80. Latsi, 105. Olatunji, 107 – Larsson, 1. Klaesson, 105+3; 112.
Makkabi (Hayfa, İsrail) - Slovan (Slovakiya) 3:1 (2:1)
Pyerro, 29. Saba, 45+2. Devid, 90+3 – Toliç, 85.
Molde (Norveç) - Klaksvik (Farer adaları) 2:0, əlavə vaxtda (1:2)
Eriksen, 17. Linnes, 112.
Servett (İsveçrə) - Reyncers (Şotlandiya) 1:1 (1:2)
Kutesa, 22 – Tavernye, 51.
Şturm (Avstriya) - PSV (Niderland) 1:3 (1:4)
Bovinq, 26 – Verman, 32. De Yonq, 40. Pepi, 85-p.
TSÇ (Serbiya) - Braqa (Portuqaliya) 1:4 (0:3)
Rakonyats, 40 – Pitsi, 9. Bruma, 13. Calo, 16. Elmusrati, 20.
Qalatasaray (Türkiyə) - Olimpiya (Sloveniya) 1:0 (3:0)
İkardi, 24.

İlk oyunları avqustun 22-23-də keçiriləcək pley-offda cütlər belə formalaşıb: Braqa – Panatinaikos, Reyncers – PSV, Makkabi H –Yanq Boyz, Antverp – Dinamo/AEK, Molde – Qalatasaray, Rakuv – Kopenhagen.