Oyundan öncə çoxları “Qarabağ”ın rahat qələbə qazanacağını düşünürdü. Qurban Qurbanov bir çox futbolçulara istirahət verərək “Olimpiya” ilə oyun üçün ehtiyat görmüşdü. Azər Bağırov isə 7 əcnəbi futbolçunu meydana buraxaraq asan təslim olmayacaqlarını göstərmiş oldu.

"Football-plus.az" xəbər verir ki, qarşılaşma meydan sahiblərinin basqısı ilə start götürdü. Artıq 15-ci dəqiqədə Nərimanın ötürməsindən sonra Diakabinin hesabı açması işləri ağdamlıların xeyrinə çevirdi. Lakin bundan sonra naxçıvanlılar əməlli-başlı oyun göstərməyə başladı. Miço və Nuno cinahlardan “köhlən atlar”ın müdafiəsinə problem yaradırdı. Adı çəkilən futbolçular, onlardan əlavə Maşike bir neçə epizodda qola yaxın olsa da, ilk hissədə hesab dəyişmədi.

Fasilədə Azər Bağırov iki dəyişikliyə əl atdı. Mütəxəssis Orxanla İsmaili döyüşə ataraq komandanın oyununu gücləndirdi. Bunun nəticəsində “qırmızı-ağlar” hesabı bərabərləşdirdi. Görüşün 54-cü dəqiqəsində Orxanın ötürməsini komandanın heyətində çox yaxşı oyun sərgiləyən Kuzmanoviç dəqiq zərbə ilə tamamladı. Düzdü, əvvəlcə Nicat İsmayıllı oyundankənar vəziyyət olduğunu düşünüb qolu ləğv etdi. Lakin VAR müdaxilə edərək referinin qərarını təsdiqləmədi. Artıq bərabər səviyyədə oyun gedirdi. Qurban Qurbanov görüşə müdaxilə edərək Zubirlə Leandronu meydana buraxdı. Komandanın cinahları sürətli hücumlar qurmağa başladı. Lakin “köhlən atlar” fərqlənə bilmirdi. Hamı qarşılaşmanın bu hesabla bitəcəyini düşündüyü anda Zubir qəhramana çevrildi. Yankoviçin kornerdən ötürməsini vinger baş zərbəsi ilə tamamladı. Beləliklə, “Qarabağ” çətinliklə də olsa, “Araz-Naxçıvan”ı 2:1 hesabıyla məğlub etdi.

Gözdən qaçmadı
* Oyun başlamamış “Qarabağ” azarkeşləri “Şahruddin, hanı” şüarını səsləndirdilər.
* Ümumiyyətlə, Ağdam təmsilçisinin azarkeşləri start fitindən öncə çox fəallıq göstərirdilər. Onlar “hava çox istidi. Saat 6-ya oyun salmayın!” şüarını səsləndirməklə PFL-ə etirazlarını bildirdilər.
* Maksim Medvedev oyundan çıxan zaman azarkeşlər onun adını səsləyərək alqışladı
* “Araz-Naxçıvan” futbolçuları oyunun sonlarında yerdə qalmağa meyl göstərirdilər. “İmarət”in üzvləri belə məqamda “ayağa qalxın, futbol oynayın!” şüarını səsləndirərək etiraz etdilər.