"Nəticə bizi razı salmasa da, oyun baxımından rəqibdən heç də geri qalmadıq. Dünənki görüşdə "Qarabağ"ın iki çatışmazlığını sezdim - tələskənlik və son nöqtəni qoya bilməmək. Oyunun startında Ağdam təmsilçisi ehtiyatlı, təmkinli oynayırdı. Lakin qol buraxandan sonra tələsməyə başladı. Cica hesabı bərabərləşdirəndən sonra da "Qarabağ" futbolçuları tələskənliyə və son nöqtəni qoya bilməməyə davam etdi. Nominal hücumçuların da işlərinin öhdəsindən yaxşı gəlmədi. Cica ampluaca forvard deyil. Amma onun düzgün mövqe seçimi, qapını görməsi, qol duyumu çox yaxşıdı. Bütün rəqibləri Ağdam təmsilçisini çox yaxşı təhlil edir. Bu təhlil nəticəsində "Qarabağ"ın cinahdan hücum quran vingerlərini - Zubirlə Leandronu zərərsizləşdirirlər. "Rakuv" da bu iki futbolçunu neytrallaşdırmışdı.

Zubirin üzərində dayanacam. Sözsüz, fransalı çox sürətli və texnikalı oyunçudu. Onun fərdi oyuna üstünlük verməsi "Qarabağ" üçün həm üstünlük, həm də ziyandı. Ziyandı ona görə ki, Zubirin üstün keyfiyyətlərinə görə rəqibin futbolçuları, əsasən də müdafiəçilər onu ciddi nəzarət altında və hədsiz blokda saxlayırlar. Buna rəğmən, Zubir yenə də fərdi oyuna üstünlük verir. "Spartak"ın Qavrilov soyadlı forvardı vardı. Qəribə və kuryoz qollar vurardı. Buna görə də tez-tez tənqid olunardı. Qavrilov da bir gün onu tənqid edənlərə belə bir cavab verdi: "Fərqi nədi necə qol vururam. Əsas odu ki, top qapı xətddini keçir". İndi Zubir də yaxşı olardı ki, gələcəkdə fərdi oyunu ilə cərimə meydançasına soxulmaq əvəzinə uzaqdan zərbələrlə qapını yoxlasın. Yəni əsas fərdi oyun yox, topu qapı xəttindən keçirməkdi. Bir məqamı da xüsusi qeyd edim. "Köhlən atlar"ın nə qədər fərdi oynayan futbolçuları olsa da, onlar ölkə çempionatında özünü doğruldur. Avropa səviyyəsində isə həmin oyunçuların ustalıq səviyyəsini aşağı olduğu görünür. Ümumi götürəndə "Qarabağ"ın dünən mübarizəni dayandırmasının başlıca səbəbi ilk oyunda 3 top buraxması idi. Həmin qollar da heç nədən, daha doğrusu, müdafiəçilərlə qapıçının səhvindən vuruldu".