Dünən Tofiq Bəhramov adına Respublika stadionunda Çempionlar Liqasının pley-off mərhələsi çərçivəsində "Qarabağ" - "Viktoriya" matçı baş tutdu. Oyun planında, qol epizodlarında, topa nəzarətdə üstünlük Ağdam təmsilçisində olsa da, hesabı açmaq mümkün olmadı.
"Football-plus.az" saytı olaraq "Qarabağ"ın sərgilədiyi oyunla bağlı Aslan Kərimovun fikrini öyrəndik. Təcrübəli mütəxəssis komandanın “Viktoriya” səddini keçəcəyinə inandığını söylədi:
"Ümumilikdə maraqlı oyun izlədik. Əvvəlcədən də bilirdik ki, çexiyalılar “2-ci nömrə” ilə oynayacaq. Əvvəlki rəqiblərlə müqayisədə "Viktoriya" Ağdam təmsilçisini daha yaxşı təhlil etmişdi. Çexiyalılar 5 müdafiəçiylə oynamaqla yanaşı, komanda şəklində də sıx müdafiə olunurdu. Buna rəğmən, sürət, texnika baxımından "Qarabağ" üstün idi. Başda Vaci olmaqla sürətli keçidlər, rəqib müdafiəsinin arxasına yaxşı asmalar edə bilirdik. 3-4 real qol imkanrımız da oldu. Sadəcə, həm rəqib qapıçı, həm də bəxt bizdən üz döndərdi. Plzen təmsilçisinin əsas üstünlüyü stardart vəziyyətlər və “2-ci mərtəbə”də daha yaxşı oynamağıdı. Onların künc zərbələrindən asmaları olduqca təhlükəliydi. İki dəfə müdafiəçilərimiz topu qapı xəttindən uzaqlaşdırdı. Əminəm ki, səfərdə də "köhlən atlar"ı belə təhlükə gözləyir. Yəqin ki, Qurban müəllim künc zərbələri zamanı yaranan təhlükələri diqqətə aldı və bunu təhlil edəcək. Zatən "Qarabağ" avrokubok matçlarında bir çox hallarda künc zərbəsindən sonra məyus olub. Məhz buna görə də Qurban müəllim son illərdə künc və cərimə zərbələri zamanı qolkiperə kömək üçün qapı xəttində bir və ya 2 oyunçu saxlayır. Hələ ki belə “sığortalanma” effekt verir.
Növbəti raund Çexiyada olacaq. "Viktoriya" nə qədər ehtiyatlı oynasa da, irəli atılacaq, əsas da standart vəziyyətlərdən fərqlənməyə çalışacaq. Rəqibin bu istəyi "Qarabağ"ın xeyrinə işləməlidi. Belə olan halda təmsilçimiz sürətli əks-hücumlarla son nöqtəni qoymalıdı. İnanıram ki, Çexiyada sevinən tərəf biz olacağıq. "Qarabağ"a uğurlar arzu edirəm".
ABDULLA İSMAYILOĞLU