Son mövsümü “Səbail”də keçirən Əfran İsmayılovun qəlbində “Qarabağ”ın xüsusi yeri var. Axı məhz bu komanda onun məşhurlaşmasında böyük rol oynayıb. Karyerasını “Kəpəz”də davam etdirəcəyi gözlənilən yarımmüdafiəçinin “Lex”lə cavab oyunu haqda fikirləri: "Mövsüm bitəndən sonra komandalar istirahətə yollanır deyə, sonradan avrokuboklara köklənmək asan olmur. "Qarabağ"ın da avrokuboklardakı ilk matçları həmişə çətin alınıb. Komanda səfərdə üstün oyun nümayiş etdirdi. Sadəcə, son nöqtəni qoya bilməmək və bəxsizlik ilə üzləşdik. Rəqib də sıx qapanaraq, yaxşı müdafiə olundu. "Lex" təmsilçimizi yaxşı təhlil etmişdi. Kadi Borges, Leandro Andrade və İbrahima Vacini yaxşı bloklamışdılar. Ona görə də adı çəkilən futbolçular bacarıqlarını ortaya qoya bilmədilər. Hazırda heyətdə Ovusu, Vaci, Ramil kimi hücumçuların yer almasına rəğmən, potensiallarını tam sərgiləyə bilmirlər. Ovusu icarədən yeni qayıdıb deyə, komanda yoldaşları ilə anlaşmaqda çətinlik çəkir. Vaci gözlənilənləri nümayiş etdirə biımir. Ramil isə çox yüklənir. Millimizin forvardı komandaya faydalı olmaq üçün hər mövqedə döyüşür, tez-tez müdafiəçilərə köməyə qaçır. Amma tək onun mübarizliyi ilə məsələ həll olunmur. Daha bir hücumçu transferi arzuolunandı. "Qarabağ"ın cavab görüşündə qələbə qazanıb, növbəti mərhələyə keçəcəyinə inanıram. Bunun üçün müdafiədə etibarlı oynamaq, mərkəzdə oyunquruculuğunu artırmaq, cinahlardan sürətli reydlər edib son nöqtəni qoymaq lazımdı".
ABDULLA İSMAYILOĞLU