“Qarabağ” Çempionlar Liqasının 1-ci təsnifat mərhələsində “Linkoln Red İmps”lə cavab matçının hazırlığını davam etdirir.

"Football-plus.az" xəbər verir ki, “köhlən atlar” Qurban Qurbanovun rəhbərliyi altında gündəlik məşqlər keçir. Bununla yanaşı, Ağdam təmsilçisi yeni futbolçu axtarışındadı. Çempiona müntəzəm oyunçular təklif olunur. Qurbanov mərkəz müdafiəçisi, sağ cinah vingeri və hücumçu transferində maraqlıdı. Klubla çalışan menecerlər bu istiqamətdə axtarışları davam etdirir. Qurban bəy üçün öncəlik müdafiəçidi. Kevin Medinanın mümkün gedişini nəzərə alan baş məşqçi bu mövqedə problemin yaşanmasını istəmir.

Futbol ictimaiyyətinin fikrincə, Ağdam təmsilçisinə yeni hücumçu da lazımdı. Lakin baş məşqçi belə düşünmür. Bəli, ağdamlılar hücum xəttinə futbolçu axtarır. Lakin əsas seçim sağ cinah vingeri olacaq. Kadi Borgeslə Ramil Şeydayevin gedişindən sonra burda axsama var. Düzdü, gənc Nəriman Axundzadə, Adama Diakabi və Leandro Andrade hücumun sağında çıxış edə bilir. Lakin azərbaycanlının hələ tam püxtələşməməsi, fransalının toparlanmaması Qurbanovu düşündürür. Leandro Andrade isə daha çox pleymeyker kimi faydalıdı. Baş məşqçi afrikalını və Yassin Benzyanı bu mövqedə oynatmaq niyyətindədi. Bu səbəbdən də sağ cinah vingerinin transferini istəyir.

Bəs Ağdam təmsilçisinin hücumçu problemi necə həll olunacaq? Qurban bəy Redon Cica, Hamidu Keyta və Juninyodan forvard kimi istifadə edəcək. Düzdü, braziliyalı hələ komandaya tam uyğunlaşmayıb. Bu səbəbdən də onun adı “Linkoln Red İmps”lə görüşün iştirak ərizəsinə salınmamışdı. Lakin Cica və Keyta 2:1 hesabı ilə başa çatan oyunda mərkəz hücumçusu funksiyasını yerinə yetirdi. Bundan əlavə, yeni sağ cinah vingeri transfer edilsə, yuxarıda adı çəkilən futbolçuların performansında hansısa eniş yaşansa, Qurbanov Adama Diakabi və Nəriman Axundzadəni hücumçu kimi də oynada bilər. Bir sözlə, “Qarabağ” üçün “transfer pəncərəsi” hələ bağlanmayıb. Ağdam təmsilçisi axtarışları davam etdirir.

İLKİN SULTANLI