Türkiyə super liqasının 4-cü turunun mərkəzi oyununda “Trabzonspor” “Qalatasaray”ı qəbul etdi.

Football-plus.az xəbər verir ki, zədə üzündən Hamşik, Visça, Abdulıkadir Ömür kimi oyunçuların xidmətindən məhrum olan son çempion bu azmış kimi, oyundan bir gün öncə qapıçısı və kapitanı Uğurcan Çakırı da itirdi. Qonaqlarda isə heyətlə bağlı heç bir problem yox idi. “Qalatasaray” fanatları 2017-dən bəri ilk dəfə Trabzonda stadiona buraxılmışdı. “Cim-Bom” oyuna daha fəal və istəkli başladı. Amma 10-cu dəqiqədən sonra meydan sahibləri də hücumda fəallaşdılar. Bir epizodda Canininin yaxın məsafədən zərbəsi dirəyə tuş gəldi. Qonaqlar ilk real fürsəti yarım saatın tamamında əldə etdilər. Türkiyə karyerasında ilk dəfə start heyətində meydana çıxan Mertens qapıçıyıa təkbətək çıxaraq hesabı açmağa çox yaxın oldu. Amma superliqada debüt oyununa çıxan 21 yaşlı qapıçı Muhammed Taha Tepe zərbənin istiqamətini düzgün müəyyənləşdirərək mükəmməl seyvlə yadda qaldı. İkinci hissə “Qalatasaray”ın üstünlüyü ilə keçsə də, “Trabzonspor” da ara-sıra təhlükəli əks-hücumlarla yadda qalırdı. Okan Buruk meydanda olduğu 65 deqəqə ərzində ofsayda düşməkdən başqa heç nə ilə yadda qalmayan Seferoviçi Qomislə əvəzləyərək yenə fransalı forvardın qəhrəmana çevriləcəyinə ümid bağladı. Amma Qomis 78-ci dəqiqədə gözəl fürsət yaxalasa da, bu dəfə fanatları sevindirə bilmədi. Umümiyyətlə, fəallığı ilə seçilən Mertensdən başqa “Qalatasaray”da digər hücum oyunçuları bu görüşdə o qədər yaxşı təsir bağışlamadılar. “Trabzonspor”da isə komandanı tərk edən Nvakaeme ilə qolu qırılan Visçanın yeri açıq-aydın görünürdü. Trezeqe hələ ki Nvakaemenin yerini doldura bilmir. Muhammed Taha Tepe matçın son anlarında Aktürkoğlunun də təhlükəli zərbəsini dəf edərək böyük alqış qazandı. Final fitindən sonra onu hətta Muslera da təbrik etdi.

Beləliklə, 2012-ci ilən bəri ilk dəfə bu komandaların oyunu qolsuz bitdi. 4 tura 7 xal toplayan Okan Burukun “Qalatasaray”ı hələ ki ötən mövsümdəki qrafikdən geri qalır. 2021/22-də Terimin “Qalatasaray”ı 4 tura 8 xal toplamışdı. “Trabzonspor”da isə işlər qaydasında getmir. Mövsümün ilk 3 rəsmi oyununda qol buraxmadan qalib gələn komanda son 4 rəsmi oyunun hamısında qələbəyə həsrət qalıb!