''Qalatasaray''da Bafetimbi Qomislə bağlı problem yaşandığını xəbər vermişdik.

"Football-plus.az" xəbər verir ki, son vaxtlar çox az şans qazanan fransalı forvardın ''Alanyaspor''la oyundan sonra səbri tükənmişdi. Həmin oyunun fasiləsində özünə yox, Barış Alpər Yılmaza şans verilməsinə əsəbləşən təcrübəli futbolçu ertəsi gün baş məşqçiyə artıq ''Qalatasaray''da oynamaq istəmədiyini demişdi. Bunu ''Fatih Karagümrük''ə qarşı son matçın ardından Okan Buruk özü açıqlamışdı. Daha sonra başqan Dursun Özbək də məsələyə qarışaraq Qomisin addımını tənqid etmiş və idarə heyətinin toplantısında onun durumunu müzakirə edəcəklərini demişdi. Hərçənd 37 yaşlı forvard sosial şəbəkədəki paylaşımında səhhəti ilə bağlı yaşadığı problem üzündən son matçın iştirak ərizəsinə düşmədiyini vurğuladı və ''digər məsələləri müzakirə etməyin yeri bura deyil. Çünki ''Qalatasaray''a və komanda yoldaşlarıma böyük hörmətim var'' ifadəsini əlavə etdi. Komandadan kənarlaşdırılan və dünən fərdi məşq edən Qomisin məsələsi rəhbərlik səviyyəsində müzakirə edildi. Amma başda kapitan Muslera olmaqla bir çox oyunçuların araya girməsi, eləcə də Okan Burukun belə vacib məqamda komandanın motivasiyasını pozmaq istəməməsi fransalı ulduzun əfv edilməsi ilə nəticələndi. Qomisin bu gün axşam məşqində iştirak edəcəyi gözlənilir.