“Fənərbaxça” bu yayın 8-ci transferini reallaşdırıb. Daha öncə heyətini Edin Ceko, Rayan Kent, Umut Nayır, Aleksander Ciku, Sebastyan Şimanski, Duşan Tadiç və Rodriqo Bekao ilə gücləndirən İstanbul nəhəngi indi də türkiyəli Bartuğ Elmazı transfer edib.

Bu keçid haqda danışmamış bir faktı qeyd edək. “Fənər” 5 illik müqavilə imzaladığı Bekao üçün “Udineze”yə 8312500 avro ödəniləcəyini açıqlayıb. Bu məbləğ qarşı tərəfə 3 il ərzində 5 hissəyə bölünərək ödəniləcək. Bununla da Bekao Türkiyə çempionatı tarixinin ən bahalı müdafiəçisinə çevrilib! Əvvəlki rekord “Qalatasaray”ın 2017-də 8 milyon avroya “San Paulu”dan transfer etdiyi braziliyalı müdafiəçi Maykona məxsus idi. Bartuğ Elmaza gəlincə, “Marsel”dən 1,2 milyon avroya transfer edilən 20 yaşlı yarımmüdafiəçi ilə üçillik müqavilə imzalanıb. Hələ ki yüksək səviyyədə özünü göstərə bilməyən bu futbolçunun transferini maraqlı edən məqam onun “Qalatasaray”ın yetirməsi olmasıdı. Bartuğ 2013-cü ildən “Cim-Bom”un akademiyasında top qovub. Türkiyənin U-16, U-17 və U-19 yığmalarında oynamış futbolçu 2020-dən etibarən “Aslan”ın əsas komandasına cəlb olunsa da, özünü göstərə bilmədi. Böyük potensialına rəğmən, 2 il ərzində cəmi 2 rəsmi oyuna çıxan Elmaz 2021/22-nin 2-ci dövrəsində müqaviləni yeniləmək istəmədi. Fanatların qəzəbinə tuş gələn və əsas komandadan kənarlaşdırılan futbolçu ötən yay Türkiyədən ayrılaraq “Marsel”lə müqavilə imzaladı. Amma burda da özünü göstərə bilməyərək mövsüm ərzində cəmi 1 rəsmi oyunda 4 dəqiqə forma geymək şansı əldə etdi. Bartuğun “Fənər”lə müqaviə imzalayandan sonra dediyi sözlər diqqəti çəkib: “Çox sevincli, qürurlu və həyəcanlıyam. “Fənər”in mənimlə maraqlandığını eşidəndə çox düşünmədən razılığımı verdim. Çünki belə klubdan təklif alanda iki dəfə düşünməyə ehtiyac qalmır. Əlimdən gələni edəcəyimə söz verirəm. İnşallah, zədəsiz bir mövsüm keçirərəm və sonda çempionluq sevinci yaşayaram”.

Onu da bildirək ki, “Fənərbaxça” srağagün doğma “Can Bartu” bazasında 1-ci liqa təmsilçisi “Gənclərbirliyi” ilə yoxlama matçı keçirib. Jurnalistlərin buraxılmadığı və ictimaiyyətə qapalı oyunda “sarı-lacivərdlilər” 5:0 hesabı ilə qalib gəliblər. Cekonun dubl etdiyi oyunda digər qolları Pedro, Şimanski və Batşuayi vurub.

"Football-plus.az"