"5 gündü təlim-məşq toplanışına start vermişik. Amma hələ tam yığışmamışıq. Amadeo gecikir. Heyətə iki legioner cəlb etmişik. Daha 2-3 futzalçı transfer etməyi planlaşdırırıq. Toplanış zamanı daha çox fiziki çalışmalar və standart vəziyyətlər üzərində işləyəcəyik. Çempionlar Liqasına ciddi hazırlaşırıq. Qarşıda ən azı 2 yoxlama görüşü keçirməyi planlaşdırırıq. Amma rəqiblərin adı bəlli deyil. Əsas məqsəd qrupda 1-ci yeri tutmaqdı. Rəqiblər haqda da təhlillər aparırıq. Aşağılamaq kimi çıxmasın, amma Türkiyə təmsilçisi "İstanbul Şişli"dən o qədər də çəkinmirik. Çünki həvəskar səviyyəli komanda təsiri bağışlayır. Avrokubok təcrübəsi də çox deyil. Almaniya "Yan Regensburq"u da gücümüzə görə rəqibdi. Amma Latviya təmsilçisindən çəkinirik. Çünki "Riqa" yenidən yığılan, çox iddialı komandadı. 4-5 güclü legioner gətiriblər ki, onlardan ikisi Argentina millisinin üzvüdü. Bir braziliyalı isə vaxtilə "Anderlext"də çıxış edib. Daha 1-2 yeni oyunçu transferi də gözlənilir. Odu ki, latviyalılar bizə nəyi var, başağrı ola bilər. Buna rəğmən, hazırlığı öz axarında davam etdirərək, rəqibləri də incələyəcəyik".