Futzal üzrə 17 qat ölkə çempionu “Araz-Naxçıvan” Çempionlar Liqasının və növbəti mövsümün hazırlığına start verib. Klubun artıq bir neçə legionerlə müqavilə müddətini uzatdığını xəbər vermişdik. Üç gün öncə isə baş məşqçi dəyişikliyi baş verdi. Joze Alesio da Silva millinin və “Araz-Naxçıvan”ın heyətində çıxış etmiş Vitali Borisovla əvəzləndi.

"Football-plus.az" olaraq Futzal Federasiyasının İcraiyyə Komitəsinin üzvü, “Araz-Naxçıvan”ın vitse-prezidenti Mahmud Sadıqovla söhbətdə yeni baş məşqçi ilə bağlı planları və bizi maraqlandıran başqa mövzuları müzakirə etdik.

- Klubda baş məşqçi dəyişikliyi baş tutdu. Lakin federasiyasının saytında Joze Alesio üçün təşəkkür mahiyyətli mesaj görmədik. Bəlkə sabiq baş məşqçi ilə anlaşılmazlıq var idi?
- Bilirsiz ki, Alesio həm də futzal millimizin baş məşqçisidi. Əsas yığma onunla yollarını ayıranda, yəqin ki, federasiya tərəfindən dediyiniz addım atılar. Mən “Araz-Naxçıvan”ın adından ona təşəkkür məktubu yollamışam. Komanda onun rəhbərliyi altında təqdirəlayiq uğurlara imza atıb. Əməyini qiymətləndirməmək yanlış olardı. Braziliyalı mütəxəssis də cavab məktubu göndərərək minnətdarlığını bildirib və bizə bundan sonra uğurlar arzulayıb. Biz tam mehriban şəraitdə sağollaşmışıq.

- Vitali Borisovun həm də əsas yığmanın baş məqşçi postuna təyinat alacağı deyilir...
- Bu ehtimallardan biridi. Lakin dəqiq deyil. Təklif kimi AFFA İcraiyyə Komitəsinə təqdim etmək ehtimalı var. Qərarı onlar verəcək. Borisovu uzun müddətdi tanıyırıq. Komandamıza və futzalımıza faydalı adamdı. Məşqçi kimi də bir neçə komandada çalışıb. İstəyərəm ki, millimiz ona tapşırılsın. Amma mənim elə səlahiyyətim yoxdu.

- Çempionlar Liqası yaxınlaşır. Qarşıda sizi ağır sınaq gözləyir. Heyətdə dəyişikliklərin olacağını demişdiz. Yenilik var?
- Bu haqda Vitali Borisovla söhbət etmişik. Onun tam sərbəstliyi var. İstədiyi futzalçını transfer etməyə hazırıq. Arzuladığı istənilən şəraiti yaratmağa çalışacağıq. Rusiya və Braziliya başda olmaqla bir çox ölkələrin çempionatlarını izləyir. Yaxın günlərdə qərarlarını və planlarını dəqiqləşdirib bizə məlumat verəcək. Onun seçiminə güvənirik. Bundan başqa, azərbaycanlı futzalçılarla da danışıqlar davam edir. Çempionlar Liqasında qarşılaşacağımız rəqiblər bəlli olandan sonra müvafiq addımlar atacağıq.

- Yerli futzalçı demişkən, Rövşən Hüseynlini “Araz-Naxçıvan”ın heyətində görmək istəyirdiz. Millinin qolkiperi təklifinizi necə dəyərləndirdi?
- Onunla görüşüb müqavilənin bütün detallarını, hədəflərimizi və şərtləri müzakirə etdik. Təklifimi qəbul etmədi. Böyük ehtimalla karyerasına Qazaxıstan “Atırau”sunda davam edəcək. Ona qərarını hörmətlə qarşıladığımı deyib uğurlar arzuladım.

- Yəqin ki, komanda istirahət edir. Məşqlər nə vaxt başlayacaq? Hazırlıq mərhələsində planlar nədən ibarətdi?
- İyunun 15-də yüngül məşqlərə start veriləcək. 20-30-u aralığında isə təlim-məşq toplanışları təşkil olunacaq. Qonşu ölkələrin klubları ilə yoldaşlıq görüşlərinin keçirilməsi istiqamətində danışıqlara başlamışıq. Hələ ki anlaşdığımız komanda yoxdu. Bəzi klublar tezliklə yekun qərarını açıqlayacaq. Ya biz səfər oyununa gedəcəyik, ya da onlar gələcək.

- Vitali Borisovun qarşısına hansı vəzifələr qoyulub?
- Ancaq daxili yarışlarda qazanılan uğurlarla kifayətlənmək istəmirik. Xüsusilə Çempionlar Liqasında yaxşı nəticə ilə Avropadakı nüfuzumuzu bərpa etmək niyyətindəyik. Bir-iki mövsüm üçün yox, dayanıqlı komanda formalaşdırıb beynəlxalq arenada gücümüzü ortaya qoymaq istəyirik.

KƏNAN BAHADIR