Türkiyə klublarının mövsümöncəsi hazırlıq oyunları barədə məlumat verməkdə davam edirik.

"Football-plus.az" xəbər verir ki, “Auqsburq”a qarşı keçirdiyi ilk oyunu fanatlar üzündən yarımçıq dayandırılan “Beşiktaş”ın 2-ci oyunu qalmaqalsız ötüşüb. İstanbul nəhəngi bu dəfə Zaltsburq yaxınlığında yerləşən Qrödiq vilayətində Macarıstanın ortabab klubu “Mezyokoveşd” ilə qarşılaşıb. Başqan Ahmet Nur Çəbinin də tribunadan izlədiyi qarşılaşmada Şenol Günəşin komandası əla təsir bağışlayaraq ilk 27 dəqiqədə 3 qol vurub və fasiləyə qədər intriqanı öldürüb. Muleka hesabına 2 qol, Abubakar isə 1 qol və 1 məhsuldar ötürmə yazıb. Daha öncə “Auqsburq”la matçda da komandasının yeganə qolunu vuran Muleka hələ ki bu hazırlıq dönəmində özünü yaxşı tərəfdən göstərməyi bacarır. Yekun nəticəni isə gənc forvard Semih Kılıçsoy müəyyənləşdirib. “Beşiktaş”ın öz yetirməsi olan və bu ildən etibarən əsas komandaya cəlb olunan 17 yaşlı oyunçu ilk dəfə qol sevinci yaşayıb. “Ağ-qaralar” Almaniya toplanışını sabah Fransa təmsilçisi “Strasbur”a qarşı oyunla başa vuracaq.

İstanbulun digər nəhəngi “Qalatasaray” isə Avstriya toplanışını məğlubiyyətlə bitirdi. Superliqanın son çempionu iyulun 18-də “Şturm”la qarşılaşdı. Ötən mövsümü Avstriya çempionatında 2-ci yerdə başa vuran Qrats təmsilçisi doğma “Merkur Arena”da keçirdiyi qarşılaşmada inamlı təsir bağışladı. “Cim-Bom” o qədər də zəif heyətlə oynamadığı görüşdə təhlükəli vəziyyətlər yaratmaqda çətinlik çəkdi. Oyunun qəhrəmanı 2006-cı (!) il təvəllüdlü Leon Qrqiç oldu. Ötən mövsüm “Şturm”un əsas komandasında cəmi 2 oyun keçirən 17 yaşlı forvard fasilədən sonra meydana çıxdı və matçın son anlarında dubl etdi. Zanyolonun ilk yarının sonlarındakı görüntüsü fanatları qorxutdu. İtaliyalı ulduzun rəqiblə mübarizə zamanı barmağı qırıldı. Amma tibbi personalın müdaxiləsindən sonra o, oyunu davam etdirdi. Maraqlıdı ki, “Qalatasaray” ötən yay da hazırlıq dönəmində Avstriyada “Şturm”a uduzmuşdu (1:2). Özü də həmin vaxt da avstriyalılar qolları 2-ci hissədə vurmuşdular. Beləliklə, “Qalatasaray” 11 günlük Avstriya toplanışını 2 qələbə, 1 heç-heçə, 1 məğlubiyyətlə tamamladı. Dünən vətənə qayıdan “sarı-qırmızılar” indi əsas diqqəti Çempionlar Liqasının 2-ci təsnifat mərhələsinə yönəldəcək. Artıq rəqib bəllidi. Evdəki qolsuz bərabərlikdən sonra Şimali Makedoniya çempionu “Struqa”nı səfərdə 2:1 hesabı ilə yenən Litva çempionu “Jalqiris” “Qalatasaray”ın rəqibi oldu. İlk görüş iyulun 25-də Vilnüsdə keçiriləcək.

Şturm (Avstriya) – Qalatasaray 2:0
Qrqiç, 71; 82.
Qalatasaray: Muslera, Boe (Dyubua, 74), Nelsson (Ross, 85), Əbdülkərim Bardakcı (Emin Bayram, 75), Anxelinyo (Kazımcan Karataş, 75), Berkan Kutlu (Həmzə Akman, 85), Midtşö (Kaan Ayhan, 75), Zanyolo (Morutsan, 64), Mertens (Yunus Akgün, 64), Kərəm Aktürkoğlu (Əmrə Kılınç, 75), Barış Alpər Yılmaz (Xəlil Dervişoğlu, 75).

Beşiktaş – Mezyokoveşd (Macarıstan) 4:0
Abubakar, 16. Muleka, 19; 27. Semih Kılıçsoy, 62.
Beşiktaş: Mərt Günok (Göktu Baytəkin, 71), Rozye (Onur Bulut, 57), Nəcip Uysal (Montero, 71), Kolli (Əmrəcan Uzunhan, 57), Masuaku (Umut Meraş, 71), Salih Uçan (Əmrəcan Bulut, 57), Fernandeş (Kərəm Kəsgin, 57), Dəmir Ege Tıknaz, Gezzal (Kartal Yılmaz, 57), Muleka (Hasiç, 81), Abubakar (Semih Kılıçsoy, 57).

Alanyaspor – Konyaspor 3:1
Oğuz Aydın, 65; 76. Efecan Karaca, 85 – Çikalleşi, 58-p.

Qaziantep – Qostivari (Şimali Makedoniya) 1:1
İlkər Karakaş, 80 – Georgiev, 53.

Gənclərbirliyi – İstanbulspor 2:1
Dilhan Dəmir, 58. Baran Başyiğit, 63 – Muammer Sarıkaya, 65.