Türkiyə təmsilçiləri yeni mövsümə hazırlığı davam etdirir.

"Football-plus.az" xəbər verir ki, qardaş ölkənin klubları ötən həftəsonu bir sıra yoxlama matçları keçiriblər. Qeyd edək ki, Rusiyadakı turnirdə “Fənərbaxça”nın “Neftçi”ni minimal hesabla yendiyi oyun barədə detalları başqa səhifədə oxuya bilərsiz.

“Qalatasaray”ın Avstriya toplanışı dünən başa çatdı. Dünənki “Şturm”la oyuna növbəti sayımızda toxunacağıq. Həftəsonu isə son çempion 24 saat ərzində iki oyun keçirdi. “Cim-Bom” iyulun 14-də Vyana “Austriya”sı ilə qarşılaşdı. 10 minə yaxın azarkeşin izlədiyi görüş İstanbul nəhəngi üçün elə də asan keçmədi. Okan Burukun komandası 2-ci hissənin əvvəllərində hesabda geri düşsə də, bu hazırlıq dönəmində özünü yaxşı tərəfdən göstərməyi bacaran Barış Alpər Yılmaz son dəqiqələrdə komandasını məğlubiyyətdən xilas etdi. İyulun 15-də isə “Qalatasaray” Macarıstanın aşağı liqa təmsilçisi “Çakvar”la qarşılaşdı. Təbii ki, Okan Buruk bu dəfə fərqli “11-liy”i meydana buraxdı. “Aslan” o qədər də güclü olmayan rəqibi inamlı şəkildə yenməyi bacardı. İcarədən qayıdan və bu hazırlıq dönəmində özünü göstərmək üçün dəridən-qabıqdan çıxan Morutsanın qol vurması diqqət çəkdi. Həm o, həm də dubl edən Zanyolo yaxşı təsir bağışladı. Yeni transfer Anxelinyo bu görüşdə ilk dəfə sarı-qırmızı forma ilə meydana çıxdı.

İyulun 9-dan etibarən Almaniyada toplanışda olan “Beşiktaş”ın bu yay keçirdiyi ilk hazırlıq oyunu qalmaqallı alındı və yarımçıq dayandırıldı. İstanbul nəhəngi iyulun 15-də Avstriyanın Tirol şəhərində yerləşən “Kufştayn Arena”da bundesliqa təmsilçisi “Auqsburq”la qarşılaşdı. Qürbətçi türkiyəli fanatlar oyuna böyük maraq göstərdilər. Şenol Günəşin komandası fasilə ərəfəsində Gezzalın ötürməsindən sonra Mulekanın vurduğu qolla ilk yarını öndə tamamladı. 1 saat tamamlanmaq üzrə olarkən “Auqbsurq” fransalı forvard Kardona ilə bərabərlik qolunu vurdu. Özünü aqressiv aparan və tribunada səs bombaları, petardlar partladan, eləcə də fişənglər yandıran “Beşiktaş” fanatları üzündən hakim əvvəlcə oyunu 47-ci dəqiqədə qısa müddətlik dayandırdı. Fanatlara dəfələrlə xəbərdarlıq edilsə də, onlar əməllərindən qalmadılar. Tribunaların meydana çox yaxın olması və partlayıcı maddələrin futbolçuların sağlamlığına ziyan vurması ehtimalı olduğu üçün hakim 79-cu dəqiqədə oyunu birdəfəlik dayandırmaq məcburiyyətində qaldı. Dünən “Qartal” Macarıstan təmsilçisi “Mezyokoveşd” ilə qarşılaşdı. Bu oyuna da növbəti sayımızda toxunacağıq. Komanda Almaniya toplanışını ayın 21-də Fransa təmsilçisi “Strasbur”a qarşı oyunla bitirəcək.

“Trabzonspor” isə heç cür qələbə qazana bilmir. İyulun 4-dən Slıoveniyada toplanışda olan Nenad Byelitsanın komandası ilk görüşdə Xorvatiyanın iddialı klublarından “Hayduk”a 0:2 hesabı ilə boyun əymişdi. Qaradənizlilərin iyulun 15-16-da keçirdikləri hər iki oyun isə eyni – 2:2 hesabı ilə başa çatıb. Macarıstanın ortabab klublarından olan “Fehervar”la görüşdə “bordo-mavililər” Maksi Qomesin erkən qolu ilə önə keçsələr də, üstünlüyü əldən verdilər və hətta məğlub duruma düşdülər. Komandanı məğlubiyyətdən Enes Bardinin cərimə zərbəsindən vurduğu baxımlı qol xilas etdi. Ertəsi gün Sloveniyanın iddialı klublarından olan “Çelye” ilə baş tutan görüş də, demək olar, eyni ssenarı ilə keçdi. “Trabzonspor” bu qarşılaşmada 2 dəfə hesabda önə keçsə də, hər iki halda üstünlüyü qoruya bilmədi. Bu dəfə qolları ötən mövsüm “İstanbulspor”da icarədə olan Kərəm Şən ilə Umut Bozok vurdu.

Maraqlı oyunlardan biri İzmirdə keçirildi. 1-ci liqa təmsilçisi “Göztəpə” ötən mövsüm premyer-liqanı tərk edən “Sauthempton”la qarşılaşdı. Bu komandaların hazırlıq matçında üz-üzə gəlməsi təsadüfi deyil. Belə ki, hər iki klub danimarkalı iş adamı Rasmus Ankersenin sahibi olduğu “Sport Republic” şirkəti tərəfindən idarə olunur. Ötən il “Göztəpə”nin səhmlərinin 70 faizini alan Ankersen özü də qarşılaşmanı tribunadan izləyirdi. 24 yaşlı forvard Yalçın Kayanın qolu ilə fasiləyə öndə yollanan “Göztəpə” 2-ci hissədə üstünlüyü qoruya bilmədi. Matçın ən diqqətçəkən epizodu 58-ci dəqiqəyə təsadüf etdi. Premyer-liqa tarixində Devid Bekhemdən sonra cərimə zərbəsindən ən çox qol vuran futbolçu statusunda olan Ceyms Uord-Praus penaltidən yararlana bilmədi. Standart zərbələrin mahir ifaçısı kimi tanınan təcrübəli oyunçu vaxtilə Bekhemin Türkiyə ilə səfər oyununda başına gələn şanssızlığı yaşadı. Belə ki, o, zərbə vurarkən ayağı sürüşdü və top qapıdan çox aralı keçdi! “Sauthempton” fanatlarının bu epizoda reaksiyası isə fərqli oldu. Onların fikrincə, Uord-Praus birinci liqada oynamaq istəmir və komandanı tərk etmək arzusundadı. Ona görə də penaltini bilərəkdən dəqiq vurmayıb... Bu epizoddan 6 dəqiqə sonra 20 yaşlı argentinalı yarımmüdafiəçi Karlos Alkaras yekun nəticəni müəyyənləşdirdi.

Austriya (Avstriya) – Qalatasaray 1:1
Holland, 49 – Barış Alpər Yılmaz, 83.
Qalatasaray: Muslera, Boe (Əmrə Kılınç, 84), Nelsson (Kaan Ayhan, 67), Əbdülkərim Bardakcı (Emin Bayram, 67), Kazımcan Karataş (Dyubua, 67), Berkan Kutlu (Metehan Baltacı, 84), Midtşö (Həmzə Akman, 67), Yunus Akgün (Morutsan, 61), Yusuf Dəmir (Mertens, 61), Kərəm Aktürkoğlu, Barış Alpər Yılmaz (Baran Dəmiroğlu, 84).

Çakvar (Macarıstan ) – Qalatasaray 2:4
Tamaş, 51. Macor, 76 – Morutsan, 3. Kaan Ayhan, 53. Zanyolo, 56; 59.
Qalatasaray: Cankat Yılmaz (Berk Balaban, 46), Əli Turap Bülbül (Canər Doğan, 46), Metehan Baltacı (Anxelinyo, 62.), Emin Bayram (Ross, 70), Dyubua, Özgür Baran Aksaka (Efe Akman, 63), Kaan Ayhan (Baran Demiroglu, 70), Morutsan, Mertens (Həmzə Akman 46), Emre Kılınç, Zanyolo.

Auqsburq (Akmaniya) – Beşiktaş 1:1
Kardona, 59 – Muleka, 42.
Beşiktaş: Ərsin Destanoğlu, Rozye, Montero (Haciahmetoviç, 67), Əmrəcan Uzunhan (Kolli, 67), Dəmir Ege Tıknaz (Masuaku, 74), Nəcip Uysal, Berkay Vardar (Salih Uçan, 74), Fernandeş (Umut Meraş, 46), Gezzal (Semih Kılıçsoy, 46), Əmrəcan Bulut (Kərəm Kəsgin, 46), Muleka (Abubakar, 67).

Fehervar (Macarıstan) – Trabzonspor 2:2
Çonqvai, 37. Kodro, 58 – Qomes, 9. Bardi, 75.
Trabzonspor: Muhammet Taha Tepe, Sərkan Asan (Strüger Larsen, 62), Benkoviç (Əli Şahin Yılmaz, 76), Hüseyin Türkmən (Kurbelis, 62), Ərən Elmalı (Arif Boşluk, 62), Doğucan Haspolat (Densvil, 62), Abdulkadir Ömür (Kərəm Şən, 76), Bakasetas (Trezeqe, 62), Visça (Bardi, 62), Orşiç (Əbdürrəhman Bayram, 76), Qomes (Umut Bozok, 62).

Çelye (Sloveniya) – Trabzonspor 2:2
Bayde, 37. Zets, 64 – Kərəm Şən, 25. Umut Bozok, 51.
Trabzonspor: Uğurcan Çakır, Strüger Larsen, Densvil, Əli Şahin Yılmaz (Doğucan Haspolat, 90), Arif Boşluk (Poyraz Yıldırım, 70), Kurbelis (Hakan Yeşil, 46), Kərəm Şən, Bardi (Salih Malkoçoğlu, 64) Əbdürrəhman Bayram (Oğuzhan Yılmaz, 55), Trezeqe (Əmirhan Zaman, 46), Umut Bozok (Enis Destan, 64).

Fənərbaxça – Neftçi 1:0
Ceko, 72.

Göztəpə - Sauthempton 1:1
Yalçın Kayan, 26 – Alkaras, 64.