Bilindiyi kimi, şənbə günü xeyriyyə matçı çərçivəsində “Beşiktaş” paytaxtımızda “Sabah”la qarşılaşdı.

Martın 26-da “Qalatasaray” da Bakıda “Qarabağ”la xeyriyyə oyunu keçirmişdi. Bu matçda nəticə hər nə qədər mühüm əhəmiyyət kəsb etməsə də, “Qalatasaray”dan fərqli “Beşiktaş” evə qələbə ilə dönə bilmədi. İstanbul nəhənginin hazırda bəlkə də Türkiyənin ən yaxşı formada olan komandası olduğunu nəzərə alsaq, 3:3-lük bərabərliyi “Sabah” üçün uğurlu nəticə saymaq olar. Buna qədər son 11 oyunda uduzmayan İstanbul nəhəngi bu matçların 10-dan qələbə ilə ayrılmışdı. Bura səfərdə “Fənərbaxça”, evdə “Qalatasaray” və xeyriyyə matçında “Atletiko” üzərində qazanılan qələbələr də daxildi. “Beşiktaş” hər nə qədər meydana ideal “11-lik”lə çıxmasa da, fasilədə Abubakar, Cenk Tosun, Jedson Fernandeş, Hadziahmetoviç kimi aparıcı oyunçular mübarizəyə qoşuldu.

Qonaqların heyətində 2 qol vuran sol müdafiəçi Umut Meraşdan başqa, Velinton, Kərəm Kəsgin, Maksim, Rozye kimi oyunçular özlərini yaxşı tərəfdən göstərməyi bacardılar. “Fanatik” nəşrinin iddiasına görə, Şenol Günəş bu futbolçuların performansından razı qalıb. Amma bəzi oyunçular əllərinə düşən fürsətdən yararlana bilmədilər. Bu oyunçuların başında qapıçı Ərsin Destanoğlu gəlir. Bilindiyi kimi, gənc qapıçı Sərgən Yalçının dönəmində əsas heyət üzvünə çevrilmiş və 2020/21-dəki çempionluqda böyük rol oynamışdı. Amma Günəş qayıdandan sonra təcrübəli Mərt Günok şans qazanmağa başladı və performansı ilə yığmada da əsas qapıçıya çevrildi. Ərsinin kobud səhvi “Sabah”ın 3-cü qolu vurması ilə nəticələndi. Yaxşı formada olmayan və yol verdiyi səhvə görə fanatlar tərəfindən tənqid atəşinə məruz qalan əlcək sahibinin bu yay satılacağı istisna olunur. Rəhbərlik onun satışından 3 milyon avro gəlir əldə etməyi planlaşdırır.

Gözdən düşən Cekson Muleka da start heyətində oynamasına baxmayaraq, qeyri-adi bir şeylə yadda qalmadı. Elə onun da yayda komandadan ayrılması sürpriz olmayacaq. Azərbaycanın U-17 yığmasında forma geymiş Berkay Vardar və 17 yaşlı Semih Kılıçsoy da özünü göstərə bilməyən futbolçular arasında yer aldı. Bazar günü dincələn “Beşiktaş” dünən hazırlığı bərpa etdi. Komandanı həftəsonu – mayın 21-də səfərdə “Adana Dəmirspor”a qarşı mühüm oyun gözləyir. Adana təmsilçisi bu mövsüm evdə uduzmayan yeganə komandadı.

"FOOTBALL-PLUS.AZ"