''Qalatasaray'' srağagün bu hazırlıq dönəmində sonuncu – 7-ci oyununu keçirərək Avstriya toplanışını başa vurdu.

İstanbul nəhəngi Zaltsburqun yaxınlığında yerləşən Qrödiq şəhərindəki ''Untersberq Arena''da ''Fiorentina'' ilə qarşılaşdı. Görüş ''Cim-Bom''un 2:1 hesablı qələbəsi ilə yekunlaşdı. Yeni transfer Haris Seferoviç bu dəfə qol vurmasa da, yenə özünü yaxşı tərəfdən göstərərək hesabına 2 məhsuldar ötürmə yazdı. 6-cı dəqiqədə Kərəm Aktürkoğlu baxımlı zərbə ilə hesabı açdı. 42-ci dəqiqədə isə Kərəmin qolu zamanı topu rəqibdən oğurlayaraq hücumu başlayan Əmrə Akbaba Seferoviçlə ''divar ötürməsi''ndən sonra komandasının ikinci qolunu vurdu. Fasilədən sonra çoxsaylı əvəzetmələr üzündən oyunun tempi aşağı düşdü. 72-ci dəqiqədə Rikardo Sottil fərqi minimuma endirərək yekun nəticəni müəyyənləşdirdi. Beləliklə, ''Qalatasaray'' bu hazırlıq dönəmini 3 qələbə, 2 heç-heçə və 2 məğlubiyyət ilə başa vurdu. Daha öncə ''Kasımpaşa'' və ''Salernitana'' ilə oyunlarda fərqlənməyi bacaran Seferoviç 3 qarşılaşmada 2 qol, 2 məhsuldar ötürməlik performans sərgiləyərək yeni klubuna çox tez uyğunlaşdığını göstərdi.

Bu arada ''Qalatasaray''ın növbəti transferi rəsmiləşdirmək üzrə olduğunu bildirək. ''Sarı-qırmızılar''ın uzun müddətdi danışıq apardığı Fredrik Midtşö srağagün, nəhayət, İstanbula gəlib. Əslində ''Alkmaar'' və Norveç yığmasının üzvü daha erkən gəlməli idi. Amma ''Alkmaar'' onu Konfrans Liqasında ''Dandi Yunayted''ə qarşı matçda oynatmaq istədiyindən danışıqlar ləngimişdi. Oyunçunu mövsümlük iştirak ərizəsinə salmaq üçün ''Qalatasaray''ın ''Alkmaar''a 2 gün vaxt verməsi öz bəhrəsini verib. 28 yaşlı futbolçunun bazar günü ''Antalyaspor''a qarşı 1-ci turun matçında meydanda olacağı gözlənilir. Midtşö ötən mövsüm ''Alkmaar''ın heyətində 41 rəsmi oyunda qol vurmasa da, hesabına 6 məhsuldar ötürmə yazıb.

ƏLİ