6 gün sonra “Qarabağ” “Gent”i Bakıda qəbul edəcək.

Bir çoxları üçün ağdamlıların meydana hansı heyətlə çıxacağı maraqlıdı. Premyer-liqadakı son iki qarşılaşmada gördük ki, “köhlən atlar”ın oyununda problem var. Qurban Qurbanovun komandası tam gücü ilə çıxış edə bilmir. Kadi Borgeslə Kvabena Ovusunun getməsi, zədəlilərin olması bu məsələdə “Qarabağ”a mane olur.

Daxili çempionatda rahat olan ağdamlıların əsas məqsədi “Gent”i keçməkdi. Qurban Qurbanov bu qəliz durumdan çıxmaq istəyir. “Köhlən atlar” Misli premyer-liqasında 21 oyuna 57 xal toplayıb. 50 yaşlı mütəxəssisin komandası “Sabah”ı 5 xal qabaqlayır. Düzdü, 22-ci turda rəqib “bayquşlar” olacaq. Qurban bəy bu görüşə də əsas heyətlə çıxmayacaq. Çünki bu qarşılaşmada məğlub olsalar belə, liderliyi əldən verməyəcəklər. Burda meydan amilini də nəzərə almaq lazımdı. “Azərsun Arena”da keçiriləcək görüşdə ağdamlıların uduzması heç də real görünmür.

Gəlin “Qarabağ”ın “Sabah”la oyunda ilk “11-liy”ini təxmin edək. Qapıda Luka Quqeşaşvili, müdafiənin solunda Toral Bayramov, mərkəzdə Kevin Medina və Bədavi Hüseynov, sağda isə Maksim Medvedev çıxış edə bilər. Yarımmüdafiənin dayağında Julio Romao və Qara Qarayevin oynamaq ehtimalı yüksəkdi. Redon Cica sol, Ramil Şeydayev sağ vinger kimi çıxış edəcək. Pleymeyker funksiyasını isə Leandro Andrade və ya Filip Ozobiç yerinə yetirə bilər. Hücumun mərkəzində Musa Qurbanlı yer alacaq. Nəticə istənilən kimi olmasa, Qurban Qurbanovun Elvin Cəfərquliyev, Abdulla Zubir, Yassin Benzya, Marko Veşoviç, Marko Yankoviç, Adama Diakabini döyüşə atmaq ehtimalı böyükdü. Nəzərinizə çatdıraq ki, “Kəpəz”lə qarşılaşmada mövsüm ərzində 4-cü sarı vərəqəsini alan Bəhlul Mustafazadə cəzalı olduğuna görə “Sabah”la oyunda meydana çıxa bilməz. Bununla belə, “Qarabağ”ın yuxarıda qeyd etdiyimiz “11-lik”lə “bayquşlar”a uduzacağı real görünmür.

İndi də keçək “Gent”lə qarşılaşmaya. Qurban Qurbanov bu görüşdə bütün kartlarından istifadə edəcək. Ən problemli məqam qapıçı ilə bağlıdı. Ola bilər ki, Luka “Sabah”la matçda özünü yaxşı tərəfdən göstərsin. Məhz bu səbəbdən gürcüstanlı “Gent”lə qarşılaşmada ilk “11-lik”də yer ala bilər. Çox səhv edərsə, Qurban Qurbanov belçikalılarla matçda Amin Ramazanovun xidmətindən yararlanacaq. Müdafiənin solunda Elvin Cəfərquliyev, mərkəzdə Bəhlul Mustafazadə və Bədavi Hüseynov, sağda isə Marko Veşoviç çıxış edəcək. Nəzərinizə çatdıraq ki, Kevin Medina cəzalı olduğuna görə “Gent”lə qarşılaşmalarda meydanda olmayacaq. Yarımmüdafiənin dayağında Qara Qarayev çıxış edəcək. Ondan bir qədər öndə Marko Yankoviç hücumların qurulmasına kömək olacaq. Bunu dəqiq bilirik ki, Zubir sol vinger kimi çıxış edəcək. Sağda isə iki seçim var: ya Ramil Şeydayev, ya da Adama Diakabi. Pleymeyker funksiyasını yerinə yetirmək üçün də 3 futbolçu var: Yassin Benzya, Leandro Andrade və Filip Ozobiç. Çox böyük ehtimalla əlcəzairli yarımmüdafiəçi Qurbanovun əsas seçimi olacaq. Çünki onun zəngin Avropa təcrübəsi var. Hücumda da 3 seçim var: Musa Qurbanlı, Ramil Şeydayev və Redon Cica. Şeydayev sağ vinger kimi çıxış etsə, “Qarabağ”ın yeni “9” nömrəsi əsas forvard olacaq. Çünki bu futbolçular arasında anlaşma əladı. Təsadüfi deyil ki, bu iki futbolçu 21 tur ərzində 30 qol vurub.

Bəli, ağdamlıların hazırda heyət baxımından problemləri var. Amma yuxarıda qeyd etdiyimiz məqamlar nəzərə alınsa, “köhlən atlar” həm “Sabah”ı, həm də “Gent”i məğlub etməyə qadirdi. “Qarabağ” hazırda ən çox qapıçı mövqeyindən əziyyət çəkir. Burda Şahruddin Məhəmmədəliyevi kimin əvəzləyəcəyi sual doğurur. Qalan futbolçulardan isə az qala üç heyət formalaşdırmaq olar.

Əlbəttə, son sözü Qurban Qurbanov deyəcək.

İLKİN SULTANLI