"Neftçi"nin Rusiyadakı turnirdəki çıxışını izləyirəm. Səmimi deyim ki, belə oyun köklü klubun adına yaraşmır. "Neftçi" futbolumuzun flaqmanıdı, həmişə yaxşı çıxışı ilə diqqəti çəkib və digər klublarımıza nümunə olub. Hazırda komandanın tək qapı xəttində yox, bütün mövqelərdə çatışmazlıq var. Baş məşqçinin adının rəsmləşməməsi də sözünü deyir. Təbii ki, komandanın təcrübəli qolkiperlərinin zədələnməsi yaxşı hal deyil. Amma belə hallardan heç kim “sığortalanmayıb”. Emil Balayevin transferi "ağ-qaralar" üçün böyük vədlər verirdi. Amma heyif ki, 5 aylığa sıradan çıxdı. Qarşıdan avrokubok oyunları gəlir. Təmsilçimiz üçün çətin olacaq. Lakin itiriləcək nəsə yoxdu. Böyük ehtimalla komanda qapı xəttində Brkiçlə gənc Rzaya güvənəcək. İnanmıram ki, "Neftçi" hazırda 5-ci qapıçı transferi etsin. Əvvəla ona görə ki, komandada yetərincə təcrübəli qolkiper var. İkincisi, əvəzedicilərdə də perspektiv vəd edən gənclər var. Onlardan kimsə əsas komandaya cəlb olunacaq. Üçüncüsü, deyək ki, yeni qapıçı transfer olundu. Bəs Emil zədədən qayıdanda, Aqil arzuolunan formaya düşəndə, Brkiç mövqeyini qorumaq üçün dəridən-qabıqdan çıxanda, Rza şans qazanmaq üçün tər tökəndə, yeni qapıçı şans qazana biləcəkmi? Kənarda qalacaqsa, əlavə xərc çəkməyin nə mənası var? Odu ki, yeni "əlcək sahibi"nin cəlb olunması inandırıcı deyil. İnanıram ki, "Neftçi" qısa zamanda toparlanıb özünü yaxşı tərəfdən göstərəcək. Zədələnən qapıçılara keçmiş olsun. Onlara tezliklə sağalıb sıraya dönmələrini arzulayıram".

"Öncəliklə onu deyim ki, komandanın daxilində deyilik. Yəni qapıçıların necə hazırlıq keçdiyini dərindən bilmirik. Heç bir oyunçu zədədən “sığortalanmayıb”. Hər halda, qapıçıların hazırlıq səviyyəsini, mənəvi-psixoloji vəziyyətlərini məşqçilər korpusu daha yaxşı bilir və bununla bağlı ciddi tədbirlərə əl atacaqlarına inanıram. Təbii ki, təcrübəli qapıçıların sıradan çıxması "Neftçi" üçün çətinliklər törədəcək. Qarşıdan avrokubok turniri və çempionat oyunları gəlir. Qapıçı komandanın yarısıdı. Müasir futbolda bir qolkiperlə kifayətlənmək olmaz. Emil Balayev, səhv etmirəmsə, bir neçə aylığa sıradan çıxıb. Amma Aqilin durumunu bilmirəm. Onun da zədəsi ciddi olacaqsa, düşünürəm ki, komandaya bir təcrübəli qapıçının transferi mütləqdi".