Kristof Qaltye ilə bağlı son həftələr yayılan xəbərlər rəsmi təsdiqini tapıb. PSJ rəhbərliyi baş məşqçi ilə yollarını ayırdığını açıqlayıb.

“Football-plus.az” xəbər verir ki, Fransa klubunun rəsmi saytının yaydığı məlumata görə, 57 yaşlı mütəxəssisin müqaviləsi qarşılıqlı razılıq əsasında ləğv edilib. Xatırladaq ki, Paris klubuna ötən ilin yayında baş məşqçi təyin olunan Qaltye ilə ikiillik müqavilə imzalanmışdı. O, son mövsümdə komandanı Liqa 1-də və Fransa Superkubokunda qələbəyə daşıyıb. PSJ-nin Çempionlar Liqasında mübarizəni 1/8 finalda dayandırdığını da xatırladaq.
Qaltyenin yerinə Luis Enrikenin təyinat alacağı gözlənilirdi. İspaniya millisinin sabiq baş məşqçisinin PSJ ilə hələ bir neçə həftə əvvəl anlaşdığı məlum olmuşdu. Onun parislilərlə imzaladığı müqavilənin müddəti 2 ildi. Anlaşmanın maliyyə detalları haqda rəsmi məlumat verilmir.