Burak Yılmaz irqçilikdə günahlandırılan məşqçinin tərəfini tutdu
Artıq ikinci gündü PSJ-nin çalışdırıcısı Kristof Qaltye Fransa futbol ictimaiyyətinin gündəmini zəbt edib. Bilindiyi kimi dünən bu mütəxəssislə bağlı böyük bir qalmaqal qopmuşdu.
“Football-plus.az” xəbər verir ki, fransalı jurnalistlər Qaltyenin ötən mövsüm işlədiyi ''Nitsa''nın idman direktoru Julyen Furnyenin klub rəhbərliyinə göndərdiyi məktubda yazılanları ələ keçirmişdilər. Orda yazılanlara əsasən məlum olmuşdu ki, Qaltye ''Nitsa''da qaradərili və müsəlman futbolçuların sayının çox olmasından, onların hər cümə günü namaz qılmağa getməsindən narazıdı. İrqçilikdə günahlandırılan 56 yaşlı mütəxəssis bir andaca ölüm təhdidləri almağa başlamış, PSJ rəhbərliyi onun evinin təhlükəsizliyini gücləndirməli olmuşdu. Hələ ki, PSJ-nin məsələ ilə bağlı daxili araşdırmaya başlaması ilə bağlı yayılan xəbərlər təsdiqini tapmayıb. Fanatlar isə iddialar təsdiqlənəcəyi halda Qaltyenin dərhal qovulmasını tələb edirlər. Amma məşqçinin tərəfini tutanlar da var. Məsələn, məşqçinin 8 il çalışdırdığı ''Sent Etyen''in rəsmisi Rolan Romeyer bunları deyib:
''Qaltye irqçidi? Həyatımda eşitdiyim ən axmaq iddiadı. Onunla işlədiyim 8 il ərzində bir dəfə də olsun irqçi olduğunu hiss etmədim. Əksinə o çalışırdı ki, Ramazan aylarında isti günlərdə futbolçuların səhhəti ilə bağlı problemi yaranmasın. Hətta imam da çağırmışdı. İmam futbolçulara anlatmalı idi ki, ağır məşqlər zamanı orucluğa 1-2 gün fasilə vermək olar. Transfer məsələlərində isə bir dəfə də olsun futbolçunun dini müzakirə olunmurdu. Qaltyeni yalnız Afrika Millətlər Kubokuna yollanmalı olan oyunçuların sayı maraqlandırırdı''.
Məşqçinin digər sabiq klubu ''Lill'' də məsələyə münasibət bildirib. Klub Qaltyenin tərəfini tutub. Açıqlamada qeyd olunub ki, əksinə məşqçi Ramazan ayında məşqlərdə həkimlərin iştirak etməsini istəyirdi. Onlar oruc tutan futbolçuların durumunu nəzarətdə saxlamalı idilər. Bu arada Qaltyenin başçılığı altında 2020/21-də ''Lill''də çempion olmuş Burak Yılmaz da sabiq məşqçisinin tərəfini tutub. Təcrübəli futbolçu ''instaqram''ının hekayə bölümündə bunları yazıb:
''Xəbərləri oxudum və bununla bağlı bəzi şeylər deməli olduğumu hiss etdim. Qaltye ilə işlədiyim müddətdə ondan dinim və ya irqim haqqımda heç bir xoşagəlməz söz eşitməmişəm.
Qaltye həm mükəmməl məşqçi, həm də əla insandı''.
Digər xəbərlər
