Lüsyen Favr yenidən “Nitsa”nı çalışdıracaq. 64 yaşlı mütəxəssis 2016-18-ci illərdə başçılıq etdiyi Fransa klubuna qayıdıb.

"Football-plus.az" xəbər verir ki, onun dönüşünə Kristof Qaltye şərait yaradıb. “Nitsa”dan ayrılan Qaltye son günlər PSJ ilə danışıq aparır. Paris klubu onunla razılığa gələndən sonra “Nitsa” rəhbərliyi ilə apardığı danışıqlarda da ortaq məxrəcə gəlib.

Yerli mənbələr, Qaltyenin tezliklə PSJ-nin baş məşqçi vəzifəsinə təyinat alacağını xəbər verir. Fransa nəhəngi ona görə “Nitsa”ya 5 milyon avro təzminat ödəyəcək. 55 yaşlı mütəxəssisin parislilərlə “2+1 il” sxemi üzrə anlaşdığı da məlum olub. PSJ-nin hazırkı çalıdırıcısı Maurisio Poçettinoya müqavilənin vaxtından əvvəl pozulmasına görə ödəyəcəyi təzminatın məbləği isə hələ ki rəsmən açıqlanmayıb.

“Ekip” qəzetinin xəbərində argentinalı mütəxəssisin müqavilənin ləğvinə görə 15 milyon avro təzminatdan başqa 2 milyon avro bonus ödənilməsini tələb etdiyi bildirilir.

Qeyd edək ki, bu bonus Poçettino və onun köməkçilərinə PSJ-də qalacaqları halda çatacaqdı. Lakin rəhbərlik onlara təzminatdan başqa hər hansı ödəniş etmək istəmir. Qaltyenin PSJ-yə təyinatı məhz bu planda anlaşılmazlığa görə yubanır.