Mövsümü 2-ci pillədə başa vuran və ölkə kubokunu qazanan “Fənərbaxça” indidən ilk transferini reallaşdırıb.

"Football-plus.az" xəbər verir ki, baxmayaraq ki, Türkiyədə yay “transfer pəncərəsi” yalnız iyunun 26-da açılacaq. İstanbul nəhəngi “Reyncers”in ulduzu Rayan Kenti heyətinə qatıb. 26 yaşlı ingiltərəli vingerin Qlazqo nəhəngi ilə müqavilə müddəti başa çatdığından o, “sarı-lacivərdlilər”ə azad agent statusunda qismət olub. Kentlə dördillik müqavilə imzalanıb. Onun illik qazancı 1,7 milyon avro təşkil edəcək. Qeyd edək ki, driblinq özəlliyi, cəldliyi və asmaları ilə diqqəti çəkən futbolçu əsasən sol cinahda oynayır. Amma o, hücumun istənilən bölgəsində oynamağı bacarır. Kent “Liverpul”un yetirməsi olsa da, əsas komanda ilə yalnız bir dəfə - 2016-da rəsmi oyuna çıxmağa müvəffəq olub. Kent karyerasının ilk illərində icarə əsasında “Koventri”, “Barnsli”, “Frayburq”, “Bristol Siti”nin şərəfini qorusa da, bu klublarda özünü göstərə bilməmişdi. Onun ulduzu 2018-də “Reyncers”ə keçəndən sonra parlamağa başladı. Bu klubda ilk mövsümü icarə əsasında keçirəndən sonra qlazqolular mersisaydlılara 7,2 milyon avro ödəyərək Kenti daimi əsasda transfer etdi. “Reyncers” 2020/21-də çempion olaraq “Seltik”in hegemonluğuna son qoydusa, növbəti mövsüm AL-in finalına qədər irəlilədi. Bu uğurlarda Kentin rolu heç də az olmadı. Ümumilikdə bu futbolçu “Reyncers”də 5 mövsüm ərzində 138 rəsmi oyuna çıxaraq 28 qol, 33 məhsuldar ötürməlik performans sərgiləyib. Onu da bildirək ki, Kent “Fənərbaxça” tarixinin 178-ci əcnəbi və cəmi 3-cü ingilis futbolçusudu. Daha öncə bu klubda ingilislərdən Horas Armitaj (1907/08) və Delian Atkinson (1995-97) çıxış edib. Horas Armitaj, ümumiyyətlə, “Fənər” tarixinin ilk əcnəbi futbolçusu sayılır!

“Fənərbaxça”dan ayrılan bir futbolçunun adı artıq rəsmən bəllidi. Enner Valensiyanın son mövsümdəki qəhrəmanlığına və göstəricilərinə baxmayaraq, rəhbərlik onu heyətdə saxlamağı, müqaviləsini yeniləməyi lazım bilmədi. 33 yaşlı ekvadorlu forvard Braziliya təmsilçisi “İnternasyonal”la üçillik müqavilə imzalayıb və artıq bu klubun formasını geyərək jurnalistlərin önünə çıxıb. Geridə qoyduğumuz mövsümdə Valensiya 48 rəsmi oyunda 29-u Türkiyə çempionatında olmaqla 33 qol vurdu. Bu performansla o, adını klubun tarixinə yazdırdı. Belə ki, buna qədər “Fənər”in tarixində bir futbolçunun mövsüm ərzində çempionatda 29 qol vurmasına yalnız bir dəfə təsadüf olunmuşdu. Bunu 1988/89-da Aykut Kocaman bacarmışdı. Ümumilikdə Valensiya 3 mövsüm ərzində “Fənər”də 116 rəsmi qarşılaşmada 59 qol, 17 məhsuldar ötürməlik performans sərgilədi.

Klubun mərkəz hücumçusu üçün ilk namizədi bəllidi. Bu, “İnter”in bosniyalı forvardı Edin Cekodu. Srağagün təcrübəli futbolçunun meneceri Alessandro Luççi danışıqlar üçün İstanbula gəlib. Luççi həm də Vinçentso Montellanın meneceridi. 37 yaşlı futbolçunun “İnter”lə müqavilə müddəti başa çatmaq üzrədi və o, iyunun 30-dan sərbəst oyunçuya çevriləcək. “Fanatik” nəşrinin yazdığına inansaq, “Fənər” Cekoya imza parasından əlavə illik 4,5 milyon avro maaş və ikiillik müqavilə təklif edib. Tanınmış oyunçunun meneceri təklifi düşünmək üçün gələn həftəyə qədər vaxt istəyib. Cekoya ABŞ-dan və Asiya ölkələrindən də təkliflər var. Amma o, karyerasını Avropada davam etdirməkdə maraqlıdı. Daha öncə “Volfsburq”, “Mançester Siti” və “Roma”nın şərəfini qoruyan Ceko son 2 ildə “İnter”in uğurları üçün tər tökürdü. 193 sm boya malik olan təcrübəli hücumçu geridə qoyduğumuz mövsümdə 52 rəsmi oyunda 14 qol, 5 məhsuldar ötürmə ilə yadda qalıb. Bosniya yığmasında isə 127 oyunda 64 qol vurub.