"1-ci liqada çıxış etmək üçün müvafiq sənədləri təqdim etmişdik. Ümidliydik ki, çıxışımıza icazə verəcəklər. Amma bu bir yana, heç yeni yaradılan yarıpeşəkar 2-ci liqada oynamığımıza belə icazə verilmədi. Səbəb də göstərmədilər. Başqa vaxt deyirlər, bölgədə futbolu dirçəldirik, inkişaf etdiririk. Hanı nəticəsi? Həqiqətən də gələcəyin futbolçuları bölgələrdə, kəndlərdə yetişir. Onları da üzə çıxarmayanda, irəli çəkməyəndə, hansı inkişafdan dəm vurmaq olar?! Bütün çətinliklərə rəğmən, çalışırıq ki, Neftçalada futbol ölməsin, komanda dağılmasın. Kəndlərdən və qonşu rayonlardan istedadlı uşaqları, yeniyetmələri cəlb edirik. "Neftçala" futbol ənənəsi olan klubdu. Həm premyer-liqa, həm də 1-ci divizion təcrübəmiz var. Nə vaxta qədər bizi Region Liqasında saxlayıb, ənənəsi olmayan, yeni yaradılan klubları peşəkar liqalara daşıyacaqlar? Hamımız azərbaycanlıyıq, digər klublar da bizimdi. Heç kimlə problemimiz yoxdu. Amma illərin komandası olan "Neftçala", "Göyəzən", "Masallı", "Xəzər Lənkəran"ı qapı arxasında qoymaq heç bir halda düz deyil. AFFA-nın qərarını həm özümüzə, həm də bizim kimi ənənəsi olan komandalara qarşı haqsız, qərəzli sayırıq. Hazırda başım qarışıqdı, amma yaxın günlərdə AFFA-ya gedib aidiyyatı şəxslərə etirazımı bildirəcəm".