"AFFA İcraiyyə Komitəsinin son qərarlarıyla tanışıq və alqışlayırıq. Əvəzedicilərin çempionatının ayrı keçirilməsi 1-ci divizionun inkişafı ilə nəticələnəcək. Burda hansı komandaların iştirak etməsinə gəlincə, birinci öz komandamızı qeyd edərdim. "Neftçala" ənənəsi olan klubdu. SSRİ dönəmindən fəaliyyət göstərən komandayıq. Elita təcrübəmiz də var. Divizion isə bizim üçün doğma çempionatdı. Çünki illərlə orda çıxış etmişik. Hətta 2 dəfə çempion olmağımıza rəğmən, elitada iştirakımıza icazə verilmədi. Yenidən diviziona qayıtmağı çox istəyirik. AFFA-nın klublara 300 min manat verməsi də yaxşıdı. Az məbləğ deyil. Düşünürəm ki, divizionda çıxış üçün bəs edər. Amma başqa bir məsələ də var. Region Liqasında çox komanda var ki, diviziona çıxmaq və maliyyə yarıdımı almaq istəyir. Belə olan halda onların hamısına bu jest ediləcək? Xeyr. Mənə elə gəlir ki, AFFA-nın köməyi ilə yanaşı, klublar da minimum ehtiyaclarını ödəməyi bacarmalıdı. Ona görə də federasiya daha çox şərtlərə uyğun gələn komandalara dəstək verəcək. Sağ olsun, "Neftçala"ya icra başçısı hər cür kömək verir. Komandamız sırf neftçalalı oyunçulardan təşkil olunub. Cəmi 1 futbolçumuz Salyanın Xıdırlı kəndindəndi. AFFA tərəfindən ayrılacaq 300 min manat futbolçularımızın rifahının və inkişafının təmin olunmasında çox kömək olardı. Stadionumuz da matçları keçirməyə yararlıdı. Gələcəkdə bazamızı da təşkil edə bilərik. Digər komandalardan "Xəzər Lənkəran 42" ilə "Füzuli" də 1-ci divizionda çıxış etməyə layiqdi. Hər ikisinin heyətində premyer-liqa təcrübəsi olan futbolçular var. Ümid edirəm ki, layiq olan komandalar 1-ci divizionda təmsil olunacaq".