Türkiyəli şoumen və iş adamı Acun Ilıcalının sahibi olduğu “Hall Siti” Türkiyədən daha bir futbolçunu transfer edə bilər.

"Football-plus.az" xəbər verir ki, bilindiyi kimi, Acun “Hall Siti”nin sahibi olandan sonra çempionşip təmsilçisi Türkiyə çempionatında çıxış edən bir çox oyunçunu heyətinə qatıb. Ozan Tufan, Doğukan Sinik, Dimitrios Pelkas, Oskar Estupinyan, Benjamin Tette və Allahyar Səyyadmaneşlə heyətini gücləndirən “pələnglər” indi də “Altay”ın 22 yaşlı vingeri Ərən Ərdoğanla ciddi şəkildə maraqlanır. İstedadlı futbolçu son mövsümdə 1-ci liqada öz oyunu ilə diqqəti çəkməyi bacarıb. Ötən yay Kazımcan Karataşı 20 milyon lirə qarşılığında “Qalatasaray”a satan “Altay” bu yay da Ərən Ərdoğanın satışından yaxşı pul qazana bilər. Hər şey uzun müddətdi bu futbolçunu izləyən “Hall Siti”nin skautlarının verəcəyi qərardan asılı olacaq. “Altay”ın öz yetirməsi olan və son mövsümdə 28 qarşılaşmada 2 qol, 5 məhsuldar ötürmə ilə fərqlənən Ərdoğana superliqa klubları da maraq göstərir. Bunlardan biri yeni mövsümdə çıxışını bərpa etməyə hazırlaşan “Hatayspor”du. Bu klubun baş məşqçisi Volkan Dəmirəl Ərən Ərdoğanın oyununu çox bəyənir. Amma hataylıların təklifi izmirliləri qane etməyib.

İyulun 5-də Türkiyəyə gələrək “Qalatasaray”la hazırlıq oyunu keçirəcəyi gözlənilən “Hall Siti” ilə bağlı daha bir xəbər var. Belə ki, Ozan Tufan bu klubdan ayrılaraq vətənə qayıtmaq istəyir. Daha dəqiq desək, o, sabiq baş məşqçisi Şenol Günəşin əlinin altında oynamaq istədiyi üçün “Beşiktaş”a keçməyə can atır. Təcrübəli futbolçunun İngiltərə klubu ilə hələ ikiillik müqaviləsi var. Buna baxmayaraq, Türkiyə mətbuatına inansaq, Ozan Acundan onu buraxmağı xaiş edib. Tufanla Günəşin yolu daha öncə həm Türkiyə yığmasında, həm də 2014/15-də “Bursaspor”da kəsişib. Şayiələrə inansaq, “Hall Siti” 28 yaşlı oyunçunu 5 milyon avrodan aşağı qiymətə buraxmaq istəmir. Ona görə də bu transferin baş tutmaq ehtimalı hələ ki yüksək qiymətləndirilmir. “Beşiktaş”dan heç kim “Hall Siti” ilə əlaqə saxlamayıb. Bu transferdə ən çox Ozan Tufan özü maraqlıdı. Ona görə də meneceri vasitəsi ilə məbləği aşağı salmağa çalışır.

Qeyd edək ki, Ozan geridə qoyduğumuz mövsümdə 44 rəsmi oyunda 8 qol vurub. O, Estupinyandan sonra “pələnglər”in ən məhsuldar 2-ci oyunçusu oldu.