Çempionşipdə mübarizə aparan ''Hall Siti'' premyer-liqaya yüksəlmək üçün heyəti gücləndirməklə məşğuldu.

Amma bu dəfə Acun Ilıcalının sahibi olduğu komanda özü ən yaxşı oyunçusunu itirə bilər. Belə ki, ''Brentford'' ''pələnglər''in istedadlı forvardı Kin Lüis-Potterdən əl çəkmir. İngiltərə mətbuatının yazdığına inansaq, ''Brentford'' hələ ötən mövsümün qış fasiləsində bu futbolçuya görə təklif irəli sürsə də ''Hall Siti'' əsas qol silahını satmaqdan imtina etmişdi. Amma bu dəfə ''Brentford'' bu futbolçunu transfer etməkdə çox qərarlıdı. Premyer-liqa təmsilçisi Lüis-Potter üçün 16+4 milyon avroluq təklif irəli sürüb. ''Hall Siti'' düşünmək üçün vaxt istəyib. Keçid baş tutsa, ''Brentford'' öz transfer rekordunu yeniləyəcək.

Hələ ki, klub tarixində ən bahalı oyunçu ötən yay ''Seltik''dən 13 milyon funt sterlinqə transfer olunan Kristofer Ayerdi. Qeyd edək ki, ''Hall Siti''nin öz yetirməsi olan və İngiltərənin U-21 yığmasının da əsas hücumçusu sayılan Lüis-Potter ötən mövsüm bütün turnirlərdə 13 qol vuraraq komandasının ən məhsuldar oyunçusu olmuşdu.