Acun Ilıcalının sahibi olduğu çempionşip təmsilçisi ''Hall Siti'' türkiyəli oyunçulara maraq göstərməkdə davam edir.

''A Spor'' kanalının yaydığı məlumata inansaq, ''Hall Siti'' ilə ''Antalyaspor'' arasında Doğukan Sinikin transferi ilə bağlı razılıq əldə olunub.

Hətta istedadlı futbolçunun tibbi müayinədən keçmək üçün İngiltərəyə yollandığı bildirilir. 23 yaşlı vinger ötən mövsüm antalyalıların heyətində öz oyunu ilə diqqət çəkərək 36 rəsmi oyunda 3 qol, 5 məhsuldar ötürmə ilə yadda qaldı. Son dönəmdə Ştefan Kunts tərəfindən Türkiyə yığmasına da cəlb olunan Doğukan ötən ay Millətlər Liqasında Litvaya qarşı səfər görüşündə iki qol vurmaqla diqqət mərkəzinə düşmüşdü. Xatırladaq ki, ''Hall Siti'' bir müddət öncə ''Fənərbaxça''dan Ozan Tufanı transfer edib. Şota Arveladzenin başçılıq etdiyi bu komanda iyulun 10-da Sakaryada məhz ''Fənər''ə qarşı yoxlama oyununda qüvvəsini sınayacaq.