Bu mövsüm yeni formatda keçirilən Rusiya kubokunda bazar günü final qarşılaşması oynanıldı.

"Football-plus.az" xəbər verir ki, adəti üzrə kubokun həlledici oyununa “Lujniki” evsahibliyi etdi. “Krasnodar” tarixində ilk dəfə kuboku başı üzrəinə qaldıra bilərdi. Bu komanda daha öncə yalnız 2014-də finalda oynamış və penalti seriyasında “Rostov”a boyun əymişdi. Maraqlıdı ki, bu dəfə də krasnodarlılar eyni aqibətlə üzləşdilər! Favorit sayılan ÇSKA sübhəli penalti qolu ilə fasiləyə öndə yollandı. Kuçayevin qazandığı penaltini Çalov dəqiq yerinə yetirdi. Amma 2-ci hissənin əvvəllərində vəziyyət dəyişdi. Kordoba hesabı bərabərləşdirdi. Kolumbiyalı forvard həm də bu mövsüm 7-ci qolunu vuraraq bu turnirin bombardiri oldu. Əsas və əlavə vaxtda başqa qol olmayınca qalib penalti seriyasında müəyyənləşdi. Burda isə Akinfeyev amili yenə öz sözünü dedi. Rusiya futboluna damğa vurmuş və DÇ-2018-də penalti seriyasında ispanların qarşısını kəsmiş 37 yaşlı əlcək sahibi budəfəki seriyada da özünü əla göstərdi. Rəqibin heyətində Batçi ilə Olusequnun zərbələrini dəf edən Akinfeyev “hərbçilər”ə qələbə qazandırdı.

Qeyd edək ki, bu qapıçı peşəkar karyerası ərzində iştirak etdiyi 7 oyunsonrası penalti seriyasının 6-dan qalib ayrılıb! O, yeganə məğlubiyyətini Rusiya yığmasının heyətində DÇ-2018-in 1/4 finalında Xorvatiya ilə dueldə yaşayıb. Olusequnu finalın antiqəhrəmanı saymaq olar. Həlledici penaltini qaçıran nigeriyalı həm də ilk yarıda komandasının qapısına təyin olunan penaltiyə də səbəbkar oldu. Beləliklə, 5 illik titul həsrətinə son qoyan ÇSKA 2013-dən bəri 1-ci, müstəqillik dönəmində isə 8-ci dəfə ölkə kubokunu qazandı. Komanda bu göstəricidə yalnız “Lokomotiv”dən (9) geri qalır. Akinfeyev isə karyerasında 21-ci titulunu qazanaraq Rusiya futbolunda üç ən titullu oyunçudan birinə çevrildi. Yuri Jirkovla Sergey İqnaşeviçin də hesabında 21 titul var. İyulun 15-də Kazanda keçiriləcək Superkubok uğrunda oyunda ÇSKA “Zenit”lə qarşılaşacaq.

Krasnodar – ÇSKA 1:1, p. - 5:6
Kordoba, 50 – Çalov, 32-p.
ÇSKA: Akinfeyev, Nababkin (Qayiç, 69), Diveyev, Roşa, Moyzes, Zaynutdinov (Karraskal, 73), Zdelar, Kuçayev (Mendes, 46), Oblyakov (Zabolotnı, 63), Medina, Çalov.