Tur “Lokomotiv”in “Fakel”in 3 oyunluq qələbə seriyasına son qoyması ilə start götürdü. “Loko” ardıcıl 13-cü çempionat oyununda qol vurmaqla son 10 ildəki ən yaxşı göstəricisinə nail oldu.

Şənbə gününün digər oyunlarına gəlincə, “Dinamo” artıq elitadan düşməsi rəsmiləşən “Torpedo”nu, “Axmat” isə düşməyə digər namizəd “Ximki”ni darmadağın etdi. “Zenit” çempion olandan sonra xal paylamaqla məşğuldu. Sergey Semakın kollektivi ötən tur olduğu kimi, bu dəfə də 2:2-lik bərabərliklə kifayətləndi. Buna qədər premyer-liqada “Zenit”ə qarşı keçirdiyi 7 oyunun hamısında uduzan “Orenburq” 8-ci cəhddə ilk xalını qazandı.

Bazar günü “Krılya Sovetov”un “Ural”ı darmadağı etməsi gözlənilməz olmadısa, “Rostov”un “Krasnodar”la görüşdə eyni aqibətlə üzləşməsi sürprizdi. Valeri Karpin heç cür komandasını toparlaya bilmir. “Rostov” ardıcıl 3-cü oyunda qol vurmadan uduzaraq son 10 ildəki ən pis göstəricisinə imza atdı. Həndbol üzrə Rusiya yığmasınını heyətində həm olimpiya, həm dünya çempionluğunu qazanmış Eduard Kokşarovun oğlu Aleksandr 18 yaş 152 günlüyündə fərqlənərək “Krasnodar”ın heyətində elitada qol vuran ən gənc futbolçu oldu. Günün və turun əsas oyunu “Otkrıtie Arena”da keçirildi. 2-ci yer uğrunda mübarizə aparan “Spartak”la ÇSKA arasındakı derbi ümidləri doğrultdu. Yaxşı formada olan, favorit sayılan və son 13 rəsmi oyunda uduzmayan ÇSKA hesabı açsa da, nəinki 3, heç 1 xal da qazana bilmədi.

Matçın qəhrəmanına çevrilən Promes hələ fasiləyə qədər hesabı bərabərləşdirdisə, son dəqiqədə “Spartak”a qələbə qazandırdı. Akinfeyev onun penaltidən zərbəsini dəf etsə də, niderlandlı ikinci cəhddən topu tora göndərməyi bacardı. “Spartak” tarixinin ən məhsuldar əcnəbi oyunçusu statsunda olan Promes daha bir önəmli göstəriciyə nail oldu O, çempionat çərçivəsində uyğun olaraq 87 və 88-ci qollarını vurdu. Bununla da Promes Yeqor Titovu (86) geridə qoyaraq Rusiya çempionatı tarixində moskvalıların ən məhsuldar oyunçusuna çevrildi!

Qeyd edək ki, hər iki komanda derbini azlıqda başa vurmalı oldu. 66-cı dəqiqədə Sobolev əlini cinsiyyət orqanına qoyaraq Roşaya qarşı ədəbsiz jest etdi və meydandan qovuldu. Maraqlıdı ki, Sobolevin bu hərəkətini hakimlərə başa salmaq istəyərkən braziliyalı müdafiəçi də əlini cinsiyyət orqanına apardı və buna görə də qovuldu!

"FOOTBALL-PLUS.AZ"