Bazar günü Türkiyə kubokunda 61-ci mövsümə yekun vuruldu. Budəfəki finala İzmirdə yerləşən “Gürsel Aksel” stadionu evsahibliyi etdi.

Düşünmək olardı ki, “İstanbul BŞ” finala daha motivasiyalı çıxacaq. Çünki komanda bu mövsüm superliqada hər iki oyunda “Fənər”ə uduzmuşdu. Əmrə Belözoğlunun komandasının həm qisas hissi, həm də avrokuboklara vəsiqə qazanmaq arzusu ilə oynayacağı gözlənilirdi. Amma belə olmadı.

"Football-plus.az" xəbər verir ki, artıq 46-cı saniyədə Arda Gülər rəqibdən topu oğurlayaraq Batşuayini qapıçı ilə duelə yolladı. Belçikalı ulduz bu dueldən qalib ayrıldı. Başakşəhərlilər bu “soyuq duş”dan uzun müddət ayıla bilmədilər. Daha rahat görünən İstanbul nəhəngi yarım saat tamam olmamış 2-ci qolu vurdu. Sağ cinahdan hücuma qoşulan Araonun ötürməsindən sonra qapıçı Muhammed Şəngəzər səhvə yol verdi. Nəticədə top önünə düşən Batşuayi boş qapını dəqiq nişan almaqla karyerasının ən rahat qollarından birini vurdu. Meydanda başverənlər Əmrəni o qədər qəzəbləndirdi ki, gənc mütəxəssis 34-cü dəqiqədə birdən-birə üç dəyişikliyə əl atdı. Əvəzlənənlərdən biri çılğın xaraketri ilə tanınan Canər Ərkin oldu. Təcrübəli futbolçunun formasını yerə atması və uzun müddət Əmrəyə etiraz etməsi gözdən qaçmadı. 2-ci hissənin əvvəllərində intriqa bidəfəlik ölə bilərdi. Amma Zaytsın zərbəsindən sonra başakşəhərliləri tir xilas etdi.

Matçın ən mübahisəli anı 67-ci dəqiqəyə təsadüf etdi. Qapıçı İrfan Can çıxışda inamsız oynadı və Yanuzay önünə düşən topu qapıya göndərdi. Amma hakim Atilla Karaoğlan top qapıya daxil olmamış fitini səsləndirdi. O, Keninin qapıçıya qarşı kobud oynadığına qərar verdi. Beləliklə, sona qədər hesab dəyişməyincə, “Fənər” 9 illik titul həsrətinə son qoydu. Komanda son titulunu 2014-cü ildə superkubokda “Qalatasaray”ı oyunsonrası penalti seriyasında yenməklə əldə etmişdi. Bu, eyni zamanda Əli Koçun 5 illik başqanlığı dönəmində qazanılan ilk titul oldu. Oyundan sonra isə Jorje Jezuş, gözlənildiyi kimi, “Fənərbaxça”dan ayrıldığını rəsmən açıqladı! Bu nəticə ilə həm də mövsümü 4-cü pillədə bitirən “Adana Dəmirspor” tarixində ilk dəfə avrokuboklara vəsiqə qazandı. Həm “Fənər”, həm “Beşiktaş”, həm də “Adana Dəmirspor” mübarizəyə Konfrans Liqasının 2-ci mərhələsindən başlayacaq.

final
Fənərbaxça – İstanbul BŞ 2:0
Batşuayi, 1; 29.
Fənərbaxça: İrfan Can Eğribayat, Fərdi Kadıoğlu, Sərdar Əziz, Salai, Peres, Arda Gülər (Mərt Hakan Yandaş, 90+1), Arao, Zayts (Osayi-Samuel, 74), İrfan Can Kahveci (Rossi, 84), Valensiya (İsmayıl Yüksək, 74), Batşuayi (Sərdar Dursun, 90+1).
İstanbul BŞ: Muhammed Şəngəzər, Ömər Əli Şahinər, Duarte, Tuba (Aleksiç, 77), Canər Ərkin (Lima, 34), Bilya (Karzev, 34), Keni, Berkay Özcan, Dəniz Türüç (Şənər Özbayraklı, 84), Sərdar Gürlər (Yanuzay, 34), Fiqueyredo.

Faktlar
* “Fənərbaxça” tarixində 18-ci dəfə finalda oynadı və 7-ci dəfə kuboka sahib çıxdı. “Fənər” bu turnirdə finallarda ən çox (11 dəfə) məğlub olan komandadı. “Qalatasaray” kuboku 18, “Beşiktaş” 10, “Trabzonspor” 9 dəfə qazanıb.
* İzmir kubokun finalına 11-ci dəfə evsahibliyi etdi. “Fənər” bu şəhərdə keçirdiyi 4-cü finalda 2-ci qələbəsini qazandı. İstanbul 22 dəfə finala evsahibliyi edib.
* “Fənərbaxça” bu mövsüm kubokda keçirdiyi 6 oyunun heç birində uduzmadan çempion oldu.
* Batşuayi 46-cı saniyədə fərqlənməklə “Fənərbaxça”nın Türkiiyə kuboku tarixində vurduğu ən erkən qolun müəllifi oldu.
* Jezuş “Fənərbaxça”nın başında sonuncu – 52-ci rəsmi oyununu keçirdi. Komanda bu matçlardan 35 qələbə, 10 heç-heçə, 7 məğlubiyyət ilə ayrılıb.
* “İstanbul BŞ” tarixində 3-cü dəfə kubokun finalında uduzdu. Komanda bundan əvvəlki 2 finalda – 2016/17-də “Konyaspor”a, 2010/11-də “Beşiktaş”a penalti seriyasında uduzmuşdu. “İstanbul BŞ” keçirdiyi ilk 3 finaldan məğlub ayrılmaqla turnirin antirekordçusu oldu!