Türkiyə yığmasının qarşıdan gələn AÇ-2024-ün seçmə oyunları üçün heyəti açıqlanıb.

Qeyd edək ki, ilk oyunda səfərdə Ermənistanı 2:1 məğlub edən qardaş ölkənin komandası 2-ci oyunda evdə Xorvatiyaya 0:2 məğlub olub. 2 oyuna 3 xal toplayan “ay-ulduzlular”ı qarşıda Latviya və Uelslə qarşılaşmalar gözləyir. Türkiyə son illərdə tez-tez qarşılaşdığı Latviya ilə iyunun 16-da Bakı vaxyı ilə saat 22.45-də “Skonto” stadionunda üz-üzə gələcək. Türkiyə ən son AÇ-2020-nin qrup mərhələsində paytaxtımızda məğlub olduğu Uelsi isə iyunun 19-da Ankarada qəbul edəcək. Oyun yenidənqurmadan sonra ötən il istifadəyə verilən “Yeni 19 may stadionu”nda keçiriləcək və 22.45-də başlayacaq. Yığmanın baş məşqçisi Ştefan Kuntsun açıqladığı budəfəki siyahıda 3 yeni isim diqqət çəkir. Söhbət Muhammed Şəngəzər, Salih Uçan və Kənan Karamandan gedir. Son iki futbolçu, təbii ki, debütant deyil. Amma onlar 2021-ci ildən bəri yığmaya dəvət almırdılar. “Beşiktaş”ın heyətində baxımlı oyunu ilə seçilən Salihin yığmaya çağrılması hələ ötən ildən gündəmdə idi. Sentyabrda onun adı siyahıya salınmayınca Uçan “mənə hörmət etməyənə mən də hörmət etməyəcəm” açıqlaması ilə diqqəti çəkmişdi. Amma o, sonradan təkbətək görüşdə Kuntsdan üzr istəyincə “buzlar ərimişdi”. Maraqlıdı ki, Uçan Türkiyə yığmasının formasını indiyə qədər cəmi bir dəfə - 2013-də Şimali İrlandiyaya qarşı yoldaşlıq oyununda geyib. “Bursaspor”un yetirməsi olan və bu mövsüm “İstanbul BŞ”də təcrübəli Volkan Babacanı start heyətindən sıxışdırmağa müvəffəq olan 26 yaşlı qapıçı Muhammed Şəngəzər isə ilk dəfə yığmaya dəvət alıb. Onu da bildirək ki, Türkiyənin iki əsas hücumçusu Cenk Tosun ilə Enes Ünal zədə üzündən yığmadan kənar qalıb.

Sonda tam siyahını sizə təqdim edirik: qapıçılar – Mərt Günok (Beşiktaş), Uğurcan Çakır (Trabzonspor), Muhammed Şəngəzər (İstanbul BŞ); müdafiəçilər – Fərdi Kadıoğlu, Samet Akaydın (hər ikisi “Fənərbaxça”), Əbdülkərim Bardakcı (Qalatasaray), Ərən Elmalı (Trabzonspor), Zəki Çəlik (Roma), Cenk Özkaçar (Valensiya), Çağlar Söyüncü (Lester), Merih Dəmiral (Atalanta), Ozan Kabak (Hoffenhaym); yarımmüdafiəçilər - Kərəm Aktürkoğlu, Barış Alpər Yılmaz (hər ikisi “Qalatasaray”), Arda Gülər, İsmayıl Yüksək, İrfan Can Kahveci (hamısı “Fənərbaxça”), Salih Uçan (Beşiktaş), Hakan Çalhanoğlu (İnter), Orkun Kökçü (Benfika), Cengiz Ündər (Marsel), Salih Özcan (Borussiya D), Kənan Karaman (Şalke-04); hücumçular – Umut Bozok (Trabzonspor), Umut Nayır (Eyupspor).