Dünən Türkiyə mətbuatında sürpriz bir xəbər yayıldı. Belə ki, ''Fanatik'' nəşrində Türkiyə yığmasında Ştefan Kunts dönəminin başa çatmaq üzrə olduğu iddiası ortaya atıldı. Həmin iddiaya görə Türkiyə Futbol Federasiyası almaniyalı mütəxəssislə görüşərək onunla yollarını ayırıb. Yeni baş məşqçinin Abdulla Avcı olacağı gözlənilir.

"Football-plus.az" xəbər verir ki, ''ay-ulduzlular'' AÇ-2024-ün seçmə mərhələsinin ilk oyununda səfərdə Ermənistanı yendikdən sonra 2-ci oyunda evdə Xorvatiyaya məğlub olmuşdu.

İddialar doğrudusa, qardaş ölkə iyunda Latviya və Uelsə qarşı oyunlara Avcının başçılığı altında çıxacaq. Bu təyinatın gələn həftə rəsmiləşəcəyi gözlənilir.

Bəzi mənbələr iddia edir ki, Öndər Karavəli, Egemən Korkmaz və hətta futbolçu karyerasını hələ başa vurmayan Burak Yılmaz da yığmanın məşqçilər korpusuna daxil olacaq.

Xatırladaq ki, Kunts bu vəzifəni 2021-in sentyabrından icra edir. Türkiyə bu məşqçi ilə DÇ-2022-yə vəsiqə uğrunda pley-off matçında iştirak etsə də, Portuqaliyaya uduzaraq turnirdən kənar qalmışdı.

Ümumilikdə Türkiyə Kuntsun dönəmində keçirdiyi 16 oyundan 10 qələbə, 2 heç-heçə, 4 məğlubiyyətlə ayrılıb. Avcıya gəlincə, ötən mövsüm ''Trabzonspor''un başında tarixi çempionluq qazanaraq məşqçilik karyerasının ən parlaq dönəmini keçirən 59 yaşlı mütəxəssis artıq yığmada iş təcrübəsinə malikdi.

O, daha öncə 2011-in noyabrından 2013-ün avqustuna qədər Türkiyə yığmasını çalışdırıb. Amma nəticələr o qədər də ürəkaçan olmamışdı (18 oyun, 6 qələbə, 4 heç-heçə, 8 məğlubiyyət).

ƏLİ