Türkiyə yığmasının Millətlər Liqasının qarşıdakı oyunları üçün heyəti açıqlanıb.

"Football-plus.az" xəbər verir ki, Türkiyə bu turnirin C liqasında Farer Adaları, Litva və Lüksemburqla birlikdə 1-ci qrupda mübarizə aparacaq. ''Ay-ulduzlular''ın baş məşqçisi Ştefan Kunts bu dəfə 5 yeni ismə dəvət göndərib. Söhbət ''Fənərbaxça''lı Fərdi Kadıoğlu, ''Renn''in qapıçısı Doğan Ələmdar, ''Heverli''nin müdafiəçisi Cenk Ozkaçar, ''Kasımpaşa''lı Ərən Almalı və ''Uotford''lu Tyaqo Çukurdan gedir. Bu siyahıda xüsusilə sonuncu futbolçu diqqət çəkir. Çünki onun adı futbolsevərlərə tanış deyil. 2002-ci il təvəllüdlü futbolçu Amsterdamda doğulub və futbola da Niderlandda başlayıb. O, 4 il ''Feyenoord''un və 4 il ''Alkmaar''ın akademiyasında top qovub. Atası türk anası niderlandlı olan bu futbolçu hər iki ölkənin vətəndaşıdı. 2021-in yanvarında o, ''Uotford''un akademiyasına keçdi. ''Uotford''un U-21 komandasını türkiyəli Ömər Rza çalışdırır.

Bu mövsümün ilk dövrəsini icarə əsasında ''Donkaster''də keçirən 196 sm boya malik forvard Türkiyənin U-17 yığmasında 2, U-21 yığmasında 5 oyun keçirib. Bu arada Kuntsun açıqladığı 27 nəfərlik siyahıda Əmrə Morun adının olmaması onun şərəfini qoruduğu ''Fatih Karagümrük''də böyük narazılıqla qarşılanıb. Klubdan bununla bağlı paylaşım gəlibsə, başqan Süleyman Hurma Kuntsun qərarını hörmətlə qarşılamağın mümkün olmadığını deyərək Əmrəni hazırda ən yaxşı formada olan yerli futbolçu adlandırıb. O ''bir insan hətta kor olsa belə Morun ikinci dövrədəki yüksəlişini görə bilərdi'' açıqlamasını verib. İstedadlı futbolçu həqiqətən də geridə qoyduğumuz mövsümün ikinci dövrəsində da diqqətçəkən performans sərgiləyərək bir sıra qollar vurmuş və karyerasının ən məhsuldar dönəmini keçirmişdi. Qeyd edək ki, mayın 27-də toplanaraq hazırlıqlara start verəcək Türkiyə yığması ML-ə iyunun 4-də ''Fatih Terim''də Farer Adalarına qarşı keçirəcəyi oyunla start verəcək. Qardaş ölkənin komandası daha sonra iyunun 7-də səfərdə Litva, 11-də səfərdə Lüksemburqla qarşılaşacaq. ''Ay-ulduzlular'' qrupdakı 4-cü matçında iyunun 14-də İzmirdəki ''Gürsel Aksel'' stadionunda Litvanı qəbul edəcək. Sonda yığmaya dəvət oyunçuların tam siyahısını təqdim edirik.

Qapıçılar - Uğurcan Çakır (Trabzonspor), Altay Bayındır (Fənərbaxça), Doğan Ələmdar (Renn); müdafiəçilər - Mərt Müldür, Kaan Ayhan (hər ikisi ''Sassuolo''), Zeki Çelik (Lill), Cenk Ozkaçar (Heverli), Çağlar Söyüncü (Lester), Merih Dəmiral (Atalanta), Ozan Kabak (Norviç), Ərən Elmalı (Kasımpaşa), Fərdi Kadıoğlu (Fənərbaxça), Rıdvan Yılmaz (Beşiktaş); yarımmüdafiəçilər - Cengiz Ündər (Marsel), Yunus Akgün (Adana Dəmirspor), Kərəm Aktürkoğlu, Berkan Kutlu (hər ikisi ''Qalatasaray''), Dorukhan Toköz (Trabzonspor), Hakan Çalhanoğlu (İnter), Orkun Kökçü (Feyenoord), Salih Özcan (Köln), Doğukan Sinik (Antalyaspor); hücumçular - Enes Ünal (Xetafe), Sərdar Dursun (Fənərbaxça), Xəlil Dərvişoğlu (Qalatasaray), Tyaqo Çukur (Uotford), Umut Bozok (Kasımpaşa).