Təbii ki, indi bütün “Qalatasaray”lıların gözü-qulağı Mauro İkardidən gələcək xəbərlərdədi. Vurduğu vacib qollarla komandanı çempionluğa daşıyan və fanatların böyük sevgisini qazanan argentinalı forvard faktiki artıq “Cim-Bom”un oyunçusu deyil!

Bilindiyi kimi, o, PSJ-nin üzvüdü və bu klubla hələ birillik müqaviləsi var. Son günlərdə onunla bağlı saysız-hesabsız şayiə dolaşır.

"Football-plus.az" xəbər verir ki, əvvəlcə “Roma”nın İkardiyə görə PSJ-yə rəsmi təklif irəli sürdüyü iddia edilmişdi.

Sonra məsələyə ərəblər qarışdı. Bu da “Qalatasaray” rəhbərliyinin ən çox qorxduğu durum idi. Çünki maddi cəhətdən ərəblərlə rəqabət aparmaq mümkünsüzdü. Səudiyyə Ərəbistanı təmsilçisi “Əl-Taavun”un 30 yaşlı futbolçuya astronomik təklif irəli sürdüyü iddia edildi. Söhbət illik 20 milyon avroluq maaşdan gedir! Səudiyyə Ərəbistanı qaynaqlarının ortaya atdığı versiyaya görə, “Əl-Taavun” artıq PSJ rəhbərliyi ilə də anlaşıb.

İkardi bu klubda ilk mövsümü icarə əsasında keçirəcək və daha sonra 2 illik daimi müqavilə imzalayacaq. Amma “TRT Spor” kanalı bu iddianı təkzib edib. Kanal İkardinin təmsilçilərindən olan Elio Pinoya əsaslanaraq tanınmış futbolçunun heç bir klubla anlaşmadığını bildirib. Hər halda, 20 milyon avroluq maaş məsələsi doğrudusa, İkardini Səudiyyə Ərəbistanına yollandığına görə heç kim günahlandıra bilməz. Sonda bu futbolçu ilə bağlı bir maraqlı xəbəri də diqqətinizə çatdıraq. İkardinin klubda qalmaq ehtimalı az olsa da, “Qalatasaray” fanatlarından biri yeni doğulan oğluna məhz onun adını verib! Daha doğrusu, körpəyə “İkardi Korkmaz” adı verilib.

Fanatın bu addımı böyük marağa səbəb olub və bu xəbər sosial şəbəkələrdə dəfələrlə “Qalatasaray”lılar tərəfindən paylaşılıb.