''Qalatasaray''ın çempionluğundan böyük rol oynayan Mauro İkardinin gələcək taleyi qeyri-müəyyən olaraq qalır.

"Football-plus.az" xəbər verir ki, hazırda tətildə olan argentinalı forvardın artıq Türkiyəyə qayıtmasına ehtiyac yoxdu. O, birdəfəlik müqavilə ilə məxsus olduğu PSJ-nin düşərgəsinə yollanacaq.

Amma məsələ burasındadı ki, İkardi PSJ-yə lazım deyil. Bu klubun 30 yaşlı futbolçuya görə tələb etdiyi məbləğ də bəlli olub. Argentinalı Paris nəhənginə 60 milyon avroya başa gəlsə də, klub onunla cəmi 10 milyon avroya vidalaşmağa hazırdı.

İkardinin cəmi birillik müqaviləsinin qalması da məbləğin aşağı olmasında az rol oynamır. İkardi uğrunda əsas favorit ''Qalatasaray'' və ''Roma'' hesab olunur.

Joze Mourinyonun komandası bu oyunçuya görə PSJ-yə 8 milyon avro təklif edib. ''Qalatasaray''ın təklif etdiyi məbləğ bəlli deyil. Amma Türkiyə mətbuatının iddiasına görə ''Cim-Bom'' İkardini daimi əsasda transfer edə bilməsə, yenidən birillik icarəyə götürməyə çalışacaq.