Türkiyənin son çempionu “Qalatasaray”la bağlı xəbərlər var. Öncə qeyd edək ki, Okan Burukun gələcək taleyinə tam aydınlıq gəldi.

"Football-plus.az" xəbər verir ki, onun klubda ən azı bir il də qalacağı rəsmi təsdiqini tapdı. Belə uğurlu və rekordlarla zəngin olan mövsümdən sonra İstanbul nəhənginin onunla yollarını ayırması qəribə olardı.

Bu məsələni aktuallaşdıran o idi ki, Okan Buruk ötən yay “sarı-qırmızılar”la “1+1” illik müqavilə imzalamışdı. Düzdü, tərəflər yeni anlaşma ilə bağlı problemin olmadığını söyləyirdilər. Amma dünənə qədər Burukla yeni müqavilə imzalanmamışdı. Dünən isə rəhbərlik onu klubun bazasına dəvət etdi. Burda gələn mövsümlə bağlı planlar cızıldı və ən əsası müqavilədəki şərti maddə qüvvəyə mindi. “Qalatasaray” artıq Türkiyə Futbol Federasiyasını da bundan xəbərdar edib. 49 yaşlı mütəxəssisin məvacibinə gəlincə, onun illik qazancı 20 milyon lirədən 30 milyon lirəyə qaldırılıb. Bu da indiki pulla təxminən 1,2 milyon avro deməkdi. Maraqlıdı ki, maaş artımına baxmayaraq Buruk hələ də iddialılar arasında ən az qazanan məşqçidi! Müqayisə üçün deyək ki, “Fənərbaxça”da Jorje Jezuş illik 3 milyon avro, “Adana Dəmirspor”da Vinçentso Montella 2 milyon avro, “Trabzonspor”da Nenad Byelitsa 1,6 milyon avro, “Beşiktaş”da Şenol Günəş 1,5 milyon avro qazanır. Amma Okan Burukun “Qalatasaray” sevgisi pulla ölçülmür. Əvvəlki açıqlamalarında dəfələrlə ən böyük arzusunun “Cim-Bom”u çalışdırmaq olduğunu gizlətməyən bu mütəxəssis bu mövsüm hətta 20 milyon lirə, yəni 800 min avro qazanarkən də bu pulun bir hissəsini “altyapı”ya bağışlamışdı.

Okan Burukdan fərqli “Qalatasaray”ın son çempionluğunda baş rollardan birini oynayan digər isimdən – Mauro İkardidən hələ ki şad xəbər yoxdu. Bilindiyi kimi, ünlü argentinalı forvard müqavilə ilə PSJ-yə məxsusdu və faktiki mövsüm başa çatan kimi Parisə qayıtmalı olacaq. Neçə müddətdi “Qalatasaray” rəsmilərinin PSJ rəhbərliyi ilə danışıqlar aparması barədə xəbərlər dolaşsa da, hələ ki ortada bir şey yoxdu.

Görünür, parislilərin tələb etdiyi məbləğ İstanbul nəhənginin “cibinə görə” deyil. Ötən sayımızda vurğuladığımız kimi, komandanın başı təzminatlar üzündən dərddədi. Bir müddət öncə İkardinin meneceri və həyat yoldaşı Vanda Nara sosial şəbəkədə fanatlara təşəkkür etmişdi. Onun sözləri vida mesajı kimi qiymətləndirilmişdi. İkardinin bu mövsümdəki mükəmməl performansı bir tərəfdən “Qalatasaray”a çempionluq qazandırdısa, digər tərəfdən Avropa klublarının ona marağını da artırdı.

“Atletiko” ilə yanaşı, indi də Joze Mourinyonun “Roma”sı 30 yaşlı futbolçuya “elçi düşüb”. “Canavarlar”da Teemu Abraham ağır zədə alaraq uzun müddətə sıradan çıxıb. Andrea Belottinin isə məhsuldarlığı aşağıdı. Mourinyonun fikrincə, İtaliya futbolunu gözəl tanıyan İkardi belə məqamda “Roma” üçün ideal transferdi. İtaliya mənbələrinin yazdığına görə, “Roma” artıq PSJ-yə 8 milyon avroluq rəsmi təklif irəli sürüb. Klubun sahibi Tomas Fridkin özü şəxsən yaxşı münasibətlərdə olduğu Nasser Əl-Xelayfi ilə əlaqə saxlayaraq İkardini transfer etmək istədiklərini bildirib. Ona görə də artıq bütün diqqətlər “Qalatasaray” başqanı Dursun Özbəkin sağ əli sayılan Ərdən Timura yönəlib. İkardinin Türkiyəyə gəlməsində böyük rol oynayan bu yönətici fanatların sevimlisini klubda saxlaya bilmək üçün xeyli əziyyət çəkməli olacaq.