Türkiyə çempionatında mövsümün bitməsinə 3 tur qalmış həm zirvədə, həm də alt pillələrdə gərgin mübarizə davam edir.

"Football-plus.az" xəbər verir ki, “Qalatasaray” ən yaxın rəqibi “Fənərbaxça”dan 5 xal öndədi və çempionluq yarışında 3 ehtimal var.

Bilindiyi kimi, hər 2 İstanbul nəhəngi son turda çempionatdan çəkilən klublarla qarşılaşmalı olduğundan onların hesabına 3 xal yazılacaq.

1-ci ehtimal odu ki, “Qalatasaray” gələn tur səfərdə “Ankaragücü”nü məğlub edəcəyi təqdirdə “Fənər”in nəticəsindən asılı olmayaraq tarixinin 23-cü çempionluğunu elan edəcək.

2-ci ehtimal “Qalatasaray”ın paytaxtdan 1 xalla dönməsidi. Bu halda “Fənərbaxça” çempion olmaq üçün əvvəlcə evdə “Antalyaspor”u yenməli, sonra da tarixi derbidə səfərdə “Qalatasaray”ı ən azı 3 top fərqi ilə məğlub etməlidi.

3-cü ehtimal isə “Cim-Bom”un Ankarada məğlub olmasıdı. Bu halda “Fənərbaxça” “Antalyaspor”u yenəcəyi təqdirdə artıq 37-ci turdakı səfər derbisində komandaya istənilən hesablı qələbə çempionluq üçün kifayət edəcək. Bu məqamda bir maraqlı faktı nəzərinizə çatdıraq. “Ankaragücü” son 2 ev oyununda “Qalatasaray”ı evə əliboş yola salıb! 2019/20-də İstanbul nəhəngi paytaxtdan 0:1, 2020/21-də isə 1:2 hesablı məğlubiyyətlərlə qayıdıb. Özü də hər 2 halda “Ankaragücü” sonda elita ilə vidalaşmışdı. Sadəcə, 2019/20-də pandemiyaya görə “düşmə” ləğv olunduğundan komanda növbəti mövsüm də elitada oynamışdı. “Qalatasaray”ın “Ankaragücü”ilə oyununa maraq qatan daha bir məqam odu ki, ankaralılar hələ elitada qalmağı rəsmiləşdirməyiblər.

Bilindiyi kimi, bu mövsüm elitanı iki komanda tərk edəcək. Onlardan biri artıq məlumdu. Söhbət “Ümraniyəspor”dan gedir. Digər “vakant” yerə 5 namizəd var. Bunlar “Girəsunspor”, “İstanbulspor”, “Sivasspor”, “Antalyaspor” və “Ankaragücü”dü. Ən ağır təqvim məhz elə ankaralılardadı. Komanda “Qalatasaray”dan başqa “Kayserispor” və “Adana Dəmirspor”la, yəni ilk “8-lik”də qərarlaşan rəqiblərlə oynayacaq.

Bu üzdən “Ankaragücü”nun hər matçda xal və ya xallar qazanmağa çalışacağı şübhə doğurmur.