“Ayntraxt” və “Napoli” avrokuboklarda daha əvvəl yalnız 1994-cü ildə qarşılaşmışdılar.

Football-plus.az xəbər verir ki, UEFA kubokunun 1/8 finalında baş tutan hər iki matç frankfurtluların munimalhesablı qələbəsi ilə nəticələnmişdi. Oliver Qlasnerin komandasının bu dəfə Çempionlar Liqasının (ÇL) eyni mərhələsində həmin uğuru təkrarlamaq ehtimalı heç də yüksək deyildi. Səbəb “Napoli”nin real gücü ilə bağlıdı. A seriyasında əsas izləyicisini 15 xal (!) qabaqlayan Luçano Spallettinin komandası ÇL-in qrup mərhələsində “Liverpul”u qabaqlamaqla 1-ci yeri tutmuşdu. Başqa sözlə, Avropa Liqasının son qalibinin püşkdə bəxti heç gətirməmişdi. Pley-offa vəsiqəni son turda “Sportinq”ə 2:1 hesabıyla qalib gəlməklə təmin edən “Ayntraxt”ın 1/8 finala evdə başlaması da rəqib üçün əlavə üstünlük sayılırdı.

Qlasnerin komandası ilk dəqiqələri çox yaxşı keçirdi. Güclü pressinqə əl atan “qartallar” neapolluları səhvə vadar edirdilər. Lakin azarkeşlərindən fantastik dəstək alan ev sahibləri bu üstünlükdən effektli şəkildə yararlana bilmədilər. Və tədricən oyunun axarı qonaqların xeyrinə dəyişməyə başladı. Oyun ərzində qapıya istiqamətlənən zərbələr üzrə rəqibini 10:1 hesabı ilə üstələyən “Napoli” 36-cı dəqiqədə hesabı açmağa çox yaxın oldu. Lakin müdafiəçi Butanın yol verdiyi qayda pozuntusuna görə təyin olunan penaltini Kvaratsxeliya qola çevirə bilmədi. Gürcü vingerə onun zərbəsinin istiqamətini düzgün müəyyənləşdirən qapıçı Trapp mane oldu. Amma çox keçmədən sürətli əks-hücum təşkil edən qonaqlar iistəyinə çatdılar: Osimhen matçın ən yaxşı oyunçusu adına layiq bilinən Losanonun ötürməsini boşa vermədi. Az sonra Losano - Osimhen kombinasiyası da qolla nəticələndi. Lakin bu qol ofsayda görə qeydə alınmadı.

58-ci dəqiqədə oyunun qalan hissəsindəki mübarizəyə çox təsiri olan epizod baş verdi. Kolo Muani itirdiyi topu geri almaq istəyərkən Zambo Angissaya xəsarət yetirdi. Üstəlik özü də zədə aldı. Epizodu düzgün dəyərləndirən portuqaliyalı hakim Artur Diaş frankfurtluların hücumçusuna birbaşa qırmızı vərəqə göstərdi. Bundan sonra meydan sahiblərinin daha bir üstünlük qazanan rəqibə qarşı işi, təbii ki, çox çətin olacaqdı. Bir neçə dəqiqədən sonra Di Lorentso cərimə meydançasında Kvaratsxeliyanın dabanı ilə ötürməsini əla dəyərləndirdi. İkinci qolla da kifayətlənməyən Spallettinin komandası hücumlara ara vermədi. Amma bunun bəhrəsini görmədi. Ona görə ki, Trapp mükəmməl oyunu ilə komandasını biabırçı hesabla uduzmaqdan xilas etdi. Belə desək, “Napoli” 1/4 finalın qapısını açdı. Doğrudu, “Ayntraxt” səfərdə daha yaxşı nəticə göstərir. Amma frankfurtluların martın 15-də Neapolda keçiriləcək cavab görüşündə iki topluq fərqi aradan qaldıracağı elə də inandırıcı görünmür. Çünki A seriyasının lideri doğma meydanda daha güclü oynayır.

Faktlar
* “Ayntraxt” ÇL-in pley-offunda oynayan 11-ci Almaniya komandası oldu. Almaniya pley-offda 10-dan artıq klubla təmsil olunan ilk ölkə kimi tarixə düşdü.
* “Napoli” avrokuboklarda “Ayntraxt”a qarşı iki məğlubiyyətdən sonra bu rəqibi üzərində ilk qələbəsini qazandı.
* “Napoli” bütün turnirlərdə keçirdiyi son 9 matçın əsas vaxtında məğlub olmayıb. Spallettinin komandası bu oyunların 8-də qələbə qazanıb, ölkə kubokunun 1/8 finalının “Kremoneze” ilə matçının əsas vaxtında isə heç-heçə (2:2) oynayıb. Son 9 oyunda 23 qol vuran cənublular qapısından 4 top buraxıblar.
* Hesabı açan Osimhen bu mövsüm bütün turnirlərdə vurduğu qolların sayını 20-yə çatdırdı. Nigeriyalı hücumçu 24 oyunda 3 məhsuldar ötürmə də verib. Onun yanvarın 18-dən sonra müxtəlif turnirlərdə ardıcıl 6-cı oyunda qapıya yol tapdığını da qeyd edək.
* Di Lorentsoya qol vurmaq imkanı yaradan Kvaratsxeliya bu mövsüm “Napoli”də bütün turnirlərdə keçirdiyi 25-ci oyunda 13-cü məhsuldar ötürməni verdi. Gürcü yarımmüdafiəçinin hesabında 12 qol da var.