A seriyasının 28-ci turunu səbirsizliklə gözləməyə dəyərdi. Söhbət turun mərkəzi oyunundan gedir. Axı Neapolda son çempionla liqanın hazırkı lideri qarşılaşacaqdı. “Milan”ın böyük ehtimalla növbəti çempiona qarşı mübarizə aparacağı hamıya aydın idi.

“Napoli”nin 33 ildən sonra İtaliya çempionu olmaq ehtimalı turdan-tura artırdı. Zarafat deyil, ötən tur “Torino”nu səfərdə 4 cavabsız qolla məğlub edən Luçano Spallettinin komandası əsas izləyicisi “Latsio”nu 19 (!) xal qabaqlayırdı. Belə fərqin finişə 11 tur qalmış formalaşması A seriyasına yaraşan fakt sayıla bilməzdi. Son çempion “Milan” isə liderlə matça ondan 23 xal geridə qalmaqla başlayacaqdı. Stefano Pyoli artıq uzun müddətdi komandasının Çempionlar Liqasına vəsiqə verən 2-4-cü yerlərdən birini tutması üçün çalışır. Məsələ aydındı, “Napoli”yə mövsümün sonuna qədər praktiki cəhətdən heç bir komanda çatmayacaq. Amma Pyoli liderlə oyundan əvvəl komandasının əsl çempiona yaraşan futbol sərgiləməyi gözlədiyini bildirmişdi: “Napoli”yə qarşı layiqli oyun göstərməyə çalışa biləcəyimizi düşünürəm. Əlbəttə, rəqib çox güclüdü, amma bu dəfə “Milan” kimi oynaya bilərik”. Aprelin 2-də keçirilən matça marağı artıran digər səbəb də vardı. Çempionlar Liqasının 1/4 finalında püşk “Milan”a məhz “Napoli”ni rəqib edib!

Ev sahiblərinin və liqanın ən yaxşı bombardiri Osimhen zədəli olduğundan “Dieqo Maradona” stadionundakı matçda iştirak edə bilmədi. Milanlıların bu səbəbdən matçı buraxan oyunçuları isə daha çox idi. Lakin qonaq komanda İbrahimoviç, Messias və Kalulunun yoxluğunu hiss et(dir)mədi. Bu fikri əminliklə iddia etmək olar: Pyolinin komandası cari mövsümdə ən yaxşı, “Napoli” isə ən zəif oyunla yadda qaldı. Neapolda 4:0 hesabıyla qalib gələn “Milan” bütün xətlərdə ideal futbol nümayiş etdirdi. Qonaqlar həm müdafiədə, həm hücum quruculuğunda, həm də əks-hücumlarda liderə əsl futbol dərsi keçdi, Spallettinin komandasına təsəlli qolunu vurmaq şansı belə vermədi. Qapıçı Meretin bir neçə epizodda real qola imkan vermədiyini də nəzərə alsaq, son çempionun necə oyun sərgilədiyi tam aydın olar. Əlbəttə, məğlubiyyət neapolluların liderliyinə heç bir təsir etmədi. Amma öz evində darmadağın olması liderə sarsıdıcı zərbədi və “Napoli” psixoloji zərbədən tezliklə qurtulmağa çalışacaq. Əks halda, Çempionlar Liqasının aprelin 12-nə və 18-nə təyin olunan oyunları Spallettinin komandası üçün daha çətin keçəcək.

“Milan” tarixə düşən qələbə ilə 3-cü yerə çıxdı. Ona görə ki, əzəli rəqib “İnter” evdə ardıcıl ikinci dəfə xal qazana bilmədi. “Fiorentina”ya minimal hesabla uduzan vitse-çempion A seriyasında ardıcıl 3-cü, son 5 oyunda isə 4-cü məğlubiyyətini aldı. Artıq rəhbərliyin baş məşqçi Simone İnzaqiyə xələf axtarışına başlaması haqda xəbərlər yayılmaqdadı.

Liderlə əsas izləyicisi arasındakı xal fərqi isə 19-dan 16-ya düşdü. Montsa səfərindən paytaxta qələbə ilə qayıdan “Latsio” 2-ci yerdə möhkəmləndi. Romanın eyniadlı komandası da hesabına maksimum xal yazdı. Hesabından 15 xal çıxılan “Yuventus” növbəti qələbə ilə avrokuboklara vəsiqə yolunda daha bir addım atdı.

Turun rəqəmi
65 - “Montsa” ilə oyun Milinkoviç-Saviç üçün əlamətdar oldu. O, “Latsio”nun 2:0 hesabıyla qalib gəldiyi matçda sonuncu qolu vurdu. Serb yarımmüdafiəçi paytaxt komandasının tarixinə ən çox qol vuran legioner futbolçu kimi düşdü. Sergey Şimali Makedoniya yığmasının sabiq hücumçusu Qoran Pandevi (64) arxada qoyaraq 65 qolla vahid liderliyi ələ aldı. “Qartallar”ın formasını 2015-ci ilin avqustundan daşıyan 28 yaşlı futbolçunun bazar günü “Latsio”nun heyətində 331-ci dəfə meydana çıxdığını da qeyd edək.

Turun ulduzu
Rafael Leao (Milan) – Neapolu fəth edən “Milan”ın bütün oyunçuları əla oynadılar. Onlar sırasında iki qol vuran Leaonu xüsusi vurğulamağa dəyər. Hesabı məhz portuqaliyalı açdı və onun dublu nəticəsində 3-cü topu buraxan “Napoli”nin oyunu xilas etmək üçün əl atdığı bütün cəhdlərin üstündən qara xətt çəkildi. Ötən mövsümün qəhrəmanı olan Rafael bu mövsüm bir qədər gerilədiyi üçün heç də az tənqid olunmurdu. 23 yaşlı hücumçu tənqidçiləri turun, həm də böyük ölçüdə mövsümün ən yaddaqalan matçındakı çıxışı ilə susdurdu.