A seriyasında mövsümün sonuna 5 tur qalmış çempion olan “Napoli” bazar günü Montsadan evə əliboş döndü. Amma bu məğlubiyyət meydana qeyri-optimal heyətlə çıxan neapolluları çox da məyus etmədi. Luçano Spallettinin son turlarda mövsüm ərzində az oynayan oyunçulara şans verməsi gözləniləndi.

Əsas diqqətlər yenə Çempionlar Liqasına (ÇL) ayrılan digər üç vəsiqə uğrunda mübarizəyə yönəlib. Hesabat turu bu baxımdan yalnız “Yuventus” və “İnter” üçün düşərli oldu. Ən nüfuzlu klub turnirinə iddialı komandalardan “Yuventus” evdə “Kremoneze”yə qalib gələrək 2-ci yerdəki mövqeyini qorudu. Qonaq komanda uzun müddət turinlilərə müqavimət göstərdi. Lakin fasilədən sonra buraxılan iki top kremonalıların A seriyasında qalmaq şansını minimuma endirdi.

Uzun müddət liderin əsas izləyicisi olan və bu statusunu əvvəlki turda itirən “Latsio” azarkeşlərini yenə məyus etdi. Paytaxt komandası evdə “Leççe”yə məğlubiyyətdən son saniyələrdə qurtula bildi. 2:2 hesablı nəticə romalıların 3-cü yerdən 4-ə düşməsinə yol açdı.
Ona görə ki, “İnter” evdə “Sassuolo”ya 4:2 hesabıyla qalib gələrək 3-cü yerə yüksəldi. Simone İnzaqinin komandası bütün turnirlərdə ardıcıl 7-ci qələbəsini qazandı. “İnter” bu göstərici ilə ÇL-in növbəti mövsümündə iştirak hüququ verən yerlərdən birini tutmaq şansını artırdı.
Milanın eyniadlı digər komandası isə ÇL şansını çətinə saldı. Son çempion Spetsiyada bir xal belə qazana bilmədi.

Qeyd edək ki, məhz ÇL-in “İnter”ə qarşı cavab yarımfinal oyununu nəzərə alan Stefano Pyoli komandasının bir sıra aparıcı oyunçularına az-çox istirahət imkanı yaratmağı lazım bilmişdi. Nəticədə iki cavabsız qolla uduzan “Milan” indi 4-cü yerdəki “Latsio”dan 4 xal geri qalır. Bu isə sona 3 tur qalmış ciddi fərq sayıla bilər. Deməli, ÇL-in növbəti mövsümündə oynamaq üçün bu turnirin qalibi olmaq və ilk növbədə “İnter”i mübarizədən kənarlaşdırmaq tələb olunur.

Turun rəqəmi
2549 – “Kremoneze” ilə oyun Poqba üçün əlamətdar oldu. Fransalı yarımmüdafiəçi 2549 gündən sonra ilk dəfə “Yuventus”un start heyətində meydana çıxdı. Dünya çempionu sonuncu dəfə ağ-qara formada belə şansı İtaliya kubokunun 2016-cı ildə “Milan”a qarşı keçirilən final matçında qazanmışdı. Qeyd edək ki, 2016-22-ci illərdə “Mançester Yunayted”də çıxış edən Pol İtaliyaya qayıdandan sonra ağır zədə aldığı üçün uzun müddət “Yuventus”un start heyətində görünməmişdi.

Turun ulduzu
Remi Uden (Leççe) - fransız futbolçu “Latsio” ilə matçda komandasının xal qazanmasında dubl etməklə rol oynadı. Maraqlıdı ki, 26 yaşlı yarımmüdafiəçi debüt mövsümünü keçirdiyi A seriyasında ilk qollarını məhz romalıların qapısından keçirdi.

Turun sitatı
Stefano Pyoli, “Milan”ın baş məşqçisi: