Nəhayət, “River Pleyt”i uzun müddətdən sonra məğlub edən tapıldı.

“Football-plus.az” xəbər verir ki, bu hadisə Argentina çempionatının 16-cı turunda baş verdi. Hesabat turunda çempionluq uğrunda yarışda bir qədər intriqa yarandı. Səbəb liderin məğlubiyyəti, əsas izləyicisinin isə maksimum xal qazanması ilə bağlıdı.

Ölkə çempionatının bürünc mükafatçısı olan “River Pleyt”in Kordobaya səfəri uğursuz alındı. Yerli “Talyeres de Kordoba” tur ərəfəsində liderdən 10 xal geri qalmaqla 4-cü yeri tuturdu. Xavyer Qandolfinin çalışdırdığı komanda oyun planında ölkə nəhəngindən geri qaldı. Demək olar ki, bütün statistik göstəricilərdə “River” üstün oldu. Amma ev sahiblərinin təcrübəli qapıçısı Errera oyunu mükəmməl keçirdi. 31 yaşlı əlcək sahibi 9 seyvlə matça damğa vurdu. Oyunun digər qəhrəmanı isə Qarro oldu. Məhz 25 yaşlı yarımmüdafiəçinin vurduğu iki qol komandasının qələbəsi üçün kifayət etdi. “River” 79-cu dəqiqədə fərqi minimuma endirsə də, qalan vaxtda bərabərlik qolunu vura bilmədi. Beləliklə, Martin Demiçelisin komandasının çempionatdakı 10 oyunluq məğlubiyyətsiz seriyası qırıldı. “Milyonçular” sonuncu dəfə liqada 5-ci turun fevralın 27-də “Arsenal”la ev oyununda (1:2) uduzmuşdular. Amma 3-cü məğlubiyyət “River”in mövqeyinə təsir etmədi. “Talyeres de Kordoba” isə vacib qələbə ilə 3-cü yerə yüksəldi.

“River Pleyt” indi əsas izləyicisini 5 xal qabaqlayır. Çünki “San Lorenso” turu maksimum nəticə ilə başa vurdu. “Banfild”lə səfər oyunu “göy-qırmızılar” üçün heç də asan keçmədi. Bu mövsüm zəif çıxış edən meydan sahibləri paytaxt komandası ilə başabaş oynadı. Heç-heçə matçın ən ədalətli nəticəsi ola bilərdi. Lakin əsas vaxta əlavə olunan 4-cü dəqiqədə Barriosun vurduğu qol qonaqlara 2:1 hesablı qələbə bəxş etdi. Ruben İnsuanın komandası ardıcıl iki heç-heçədən sonra qalib gəlməklə həm liderlə xal fərqini azaltdı, həm də 2-ci yerdə möhkəmləndi.

Tura 3-cü yerdə başlayan “Defensa y Xustisiya” evdə “Estudiantes”lə 1:1 hesablı heç-heçəyə razılaşdı. İki xal itkisi meydan sahiblərinə mövqeyini əldən vermək bahasına başa gəldi.

Əvvəlki turda “superklasiko”da əzəli rəqibi “River Pleyt”ə uduzan (0:1) “Boka Xuniors” evdə “Belqrano”nun qapısından iki cavabsız top keçirdi. Bu qələbə Mariano Erronun çalışdırdığı son çempionu turnir cədvəlində yalnız 14-cü yerdən 13-ə çıxardı. Göründüyü kimi, bu mövsüm “Boka”nın işləri qaydasında deyil...

Son çempion kimi, vitse-çempion da azarkeşlərini məyus etməkdədi. “Boka”ya baxanda “Rasinq”in vəziyyəti daha acınacaqlıdı. “Platense”yə 0:3 hesabıyla uduzan Fernando Qaqonun komandası ardıcıl 4-cü, son 6 oyunda isə 5-ci dəfə məğlub oldu. 18 xala malik olan “Rasinq” 5 pillə geriləməklə 20-ci yerə yuvarlandı. Qaqo bu gedişlə vəzifəsini itirəcək...

16-cı tur
Talyeres de Kordoba - River Pleyt 2:1
Qarro, 63; 73 – M.Suares, 79.
Banfild - San Lorenso 1:2
Bisans, 28 – Elias, 12. Barrios, 90+4.
Defensa y Xustisiya - Estudiantes 1:1
N.Fernandes, 37 – Rollhayser, 45+2.
Boka Xuniors - Belqrano 2:0
Payero, 49. Benedetto, 52.
Platense - Rasinq 3:0
Valdivia, 5. R.Martines, 24. Servetto, 90+6-p.
Atletiko Urakan - Qodoy Krus 0:0
Atletiko Tukuman - Arxentinos Xuniors 1:2
Menendes, 43-p. – Mak Allister, 14. Avalos, 47.
İndependyente - Tiqre 2:1
Valyexo, 5. Kauteruçço, 90+5 – Retegi, 31-p.
İnstituto - Kolon 1:0
A.Martines, 90+2.
Nyuellz Old Boyz - Arsenal 2:0
Sordo, 33; 89.
Barrakas Sentral – Sentral Kordoba 2:2
Tapya, 59-p. Frias, 88 – Qamba, 13. Kastelli, 37.
Union - Sarmyento 0:2
Toledo, 17; 54.
Ximnasiya - Lanus 1:0
Komba, 90+2.
Veles Sarsfild - Rosario Sentral 0:0

1. River Pleyt 16 12 1 3 27-8 37
2. San Lorenso 16 9 5 2 17-6 32
3. Talyeres de Kordoba 16 9 3 4 29-15 30
4. Defensa y Xustisiya 16 8 5 3 21-9 29
5. Estudiantes 16 8 4 4 19-14 28
6. Rosario Sentral 16 7 6 3 23-19 27
7. Belqrano 16 8 3 5 14-13 27
8. Lanus 15 7 4 4 22-15 25
9. Arxentinos Xuniors 16 6 5 5 21-15 23
10. Qodoy Krus 16 6 5 5 18-18 23
11. Nyuellz Old Boyz 16 6 5 5 14-14 23
12. Sarmyento 16 6 4 6 18-15 22
13. Boka Xuniors 16 6 3 7 20-16 21
14. Tiqre 16 5 6 5 17-18 21
15. Ximnasiya 16 6 3 7 16-23 21
16. Platense 16 5 5 6 18-21 20
17. İnstituto 16 5 5 6 14-19 20
18. Sentral Kordoba 16 5 4 7 12-18 19
19. Barrakas Sentral 16 4 6 6 15-20 18
20. Rasinq 16 5 3 8 19-26 18
21. Veles Sarsfild 16 3 8 5 16-15 17
22. İndependyente 16 3 8 5 15-18 17
23. Kolon 16 3 8 5 14-17 17
24. Atletiko Urakan 16 4 5 7 15-20 17
25. Banfild 16 3 6 7 10-19 15
26. Atletiko Tukuman 16 2 8 6 13-20 14
27. Arsenal 16 3 2 11 12-24 11
28. Union 15 1 6 8 8-22 9

Bombardirlər: Retegi (Tiqre), M.Santos (Talyeres de Kordoba) - 10, Avalos (Arxentinos Xuniors), Kauteruçço (İndependyente), Veqetti (Belqrano) - 9, L.Dias (Lanus), N.Fernandes (Defensa y Xustisiya) - 8.