“River Pleyt” Argentina çempionatının 9-cu turunun oyunlarından sonra liderliyini qorudu.

"Football-plus.az" xəbər verir ki, ölkə nəhəngi mövqeyini bir qədər də möhkəmləndirdi. Martin Demiçelisin komandası turu maksimum nəticə ilə başa vurdu. “River Pleyt” evdə “Union”un qapısından bir top keçirdi. Ölkə çempionatının bürünc mükafatçısı yarımmüdafiəçi İqnasio Fernandesin erkən qolu ilə istəyinə çatdı. Rəqib oyunçu Maçukanın 66-cı dəqiqədə meydandan qovulmasının “milyonçular”ın işinə yaradığını da vurğulayaq. “River Pleyt” ardıcıl dördüncü, son 7 oyunda isə 6-cı qələbə ilə mövqeyini möhkəmləndirdi.

Ona görə ki, liderin əsas izləyicisi yenə büdrədi. “San Lorenso” evdə “İndependyente”dən yalnız bir xal ala bildi. Ruben İnsuanın komandası böyük üstünlükdən heç cür yararlana bilmədi. Bunun əsas səbəbkarı isə 6 seyv edən qapıçı Rey oldu. Qolsuz heç-heçə paytaxt klubunu liderdən 4 xal geri saldı.
“Göy-qırmızılar”ın əsas izləyiciləri müxtəlif nəticələr göstərdilər. Tura hərəyə 14 xalla başlayan komandalardan “Lanus” və “Nyuellz Old Boyz” məğlub oldu. “Defensa y Xustisiya” hesabına 1 xal yazdı. “Rasinq” və “Rosario Sentral” isə qələbə qazandı. Artıq mövsümə uğursuz startını unutduran “Rasinq” evdə “Atletiko Urakan”ı 2:1 hesabıyla məğlub etdi. Son mövsümün vitse-çempionu ardıcıl 3-cü qələbəsini qazandı. Fernando Qaqonun komandası 4-cü yerdən 3-ə çıxdı. “Rosario Sentral” isə “Ximnasiya” üzərində 3:1 hesablı qələbə ilə 7-ci yerdən 4-yə yüksəldi.

Tur son çempion üçün də uğurlu alındı. Qeyd edək ki, əvvəlki üç oyunda yalnız bir xal qazanan “Boka Xuniors”da baş məşqçi dəyişikliyi zəruri sayılıb. Rəhbərlik 8-ci turun ev oyununda “İnstituto”ya məğlubiyyətdən (2:3) sonra Uqo İbarra ilə yolları ayırmaq qərarına gəlib. Nəticədə 49 yaşlı mütəxəssisin paytaxt klubundakı fəaliyyəti yalnız 8 ay çəkib. Bu müddətdə komandanı ölkə çempionluğuna daşıyan sabiq müdafiəçinin səlahiyyətləri müvəqqəti Mariano Errona tapşırılıb. 45 yaşlı mütəxəssisin baş məşqçi kimi debütü uğurlu alındı. “Boka Xuniors” səfərdə “Barrakas Sentral”ın qapısından üç cavabsız top keçirdi. İnamlı qələbə çempionu 6 pilləlik sıçrama ilə 8-ci yerə yüksəltdi.