Dünən Türkiyə çempionatının 13-cü turu çərçivəsində ''Qalatasaray''la ''Beşiktaş'' arasında böyük səbirsizliklə gözlənilən İstanbul derbisi baş tutdu.

Şenol Günəşin təyinatından sonra ilk oyunda qələbə qazanan ''Beşiktaş'' bunun davamını gətirə bilmədi. İkardinin 18-ci dəqiqədəki qoluna 10 dəqiqə sonra Cenk Tosun cavab versə də, argentinalı forvard 59-cu dəqiqədə dublunu rəsmiləşdirərək ''Qalatasaray''a qələbə qazandırdı. Derbidə bir sıra maraqlı göstəricilər qeydə alındı. Əvvəlcə bildirək ki, Türkiyə çempionatı tarixində ''Beşiktaş''ı ən çox məğlub edən (48) və bu komandanın qapısına ən çox qol (158) vuran məhz ''Qalatasaray''dı!

Bundan başqa ''Cim-Bom''un 2011-də istifadəyə verilən ''Nef Stadionu''nda çempionat çərçivəsində ən çox (9 dəfə) məğlub etdiyi iki klubdan biri ''Beşiktaş''dı (digəri ''Sivasspor''du). Mauro İkardi ''Qalatasaray''ın heyətində ''Beşiktaş''a qol vuran ilk argentinalı forvard kimi tarixə düşdü. Bundan başqa İkardi Didye Droqbadan (2013-ün sentyabrından) bu yana derbidə ''Beşiktaş''a 2 qol vuran ''Qalatasaray''ın ilk əcnəbi futbolçusu oldu. ''Ağ-qaralar''ın müdafiədəki problemlərinə hələ ki, Günəş də çarə tapa bilmir. Komanda çempionatda ardıcıl 4-cü oyunda 2 top buraxdı ki, sonuncu dəfə bu cür uğursuz seriya 2004-ün fevral-martında Mirça Luçeskunun dönəmində yaşanmışdı.

Onu da bildirək ki, Okan Buruk məşqçi karyerasında Şenol Günəşə qarşı 8-ci oyunda ilk qələbəsini qazandı (1 heç-heçə, 6 məğlubiyyət).